Azərbaycan və İrlandiya rəsmiləri əməkdaşlıqda dinamikanı müsbət qiymətləndirib

Azərbaycan Respublikasının xarici işlər naziri Ceyhun Bayramov İrlandiya Respublikasının Avropa işləri və müdafiə məsələləri üzrə dövlət naziri Tomas Birn ilə görüşdü. Görüş Avropada Təhlükəsizlik və Əməkdaşlıq Təşkilatının (ATƏT) Nazirlər Şurasının Vyanada keçirilən 32-ci iclası çərçivəsində baş tutub. Rəsmilər diplomatik əlaqələrin qurulmasının 30 illik yubileyinin 2026-cı ilə düşməsi fonunda, indiyədək əldə edilən iki ölkə arasında əməkdaşlıq dinamikasını müsbət qiymətləndirdilər. Tərəflər bu əməkdaşlığın gələcəkdə daha geniş şəkildə həyata keçirilməsinin vacibliyini vurğuladılar. Onlar siyasi dialoqun gücləndirilməsi yollarını müzakirə etdilər. Həmçinin, iqtisadiyyat, ticarət, investisiyalar, təhsil və yüksək texnologiyalar sahələrində mövcud potensial dəyərləndirildi.

Görüşdə enerji təhlükəsizliyi və bərpa olunan enerji sahələrində tərəfdaşlıq imkanları əsas müzakirə mövzularından biri idi. Azərbaycanın Avropa İttifaqının enerji təhlükəsizliyinə verdiyi töhfə xüsusi qeyd edildi. Ölkəmizin təşəbbüsü və aktiv iştirakı ilə həyata keçirilən böyük enerji, nəqliyyat-kommunikasiya layihələrinin beynəlxalq əhəmiyyəti vurğulandı. Bu layihələr regional və qlobal enerji təchizatının şaxələndirilməsində mühüm rol oynayır. Rəsmilər çoxtərəfli platformalarda qarşılıqlı faydalı əməkdaşlığın davam etdirilməsinin zəruriliyini bildirdilər. Onlar qarşılıqlı maraq doğuran fərqli məsələlər ətrafında fikir mübadiləsi apardılar.

Nazirlər regional və beynəlxalq gündəlikdə duran məsələləri nəzərdən keçirdilər, Cənubi Qafqaz regionundakı vəziyyət barədə fikir mübadiləsi edildi. Azərbaycanın ərazi bütövlüyü və suverenliyinin bərpasından sonra bölgədə yaranan yeni reallıqlar haqqında Tomas Birnə məlumat verildi. Post-münaqişə dövründə Azərbaycanın təşviq etdiyi sülh gündəliyi və Ermənistan ilə normallaşma prosesi ətraflı izah edildi. Görüşdə həmçinin, bölgədəki mina təhlükəsi də qaldırıldı. Bu təhdidlə mübarizənin əhəmiyyəti qarşı tərəfə çatdırıldı. Tərəflər iki ölkə arasındakı əlaqələri inkişaf etdirmək üçün ortaq fikirlərə gəldilər.