Azərbaycan və İtaliya XİN başçıları strateji tərəfdaşlığın inkişafını müzakirə ediblər - YENİLƏNİB

Azərbaycan Xarici İşlər naziri Ceyhun Bayramov İtaliyaya rəsmi səfəri çərçivəsində bu ölkənin Baş nazirinin müavini, Xarici İşlər və Beynəlxalq Əməkdaşlıq naziri Antonio Tayani ilə görüşüb. Görüş zamanı Azərbaycan və İtaliya arasında yüksək səviyyəli strateji tərəfdaşlığın inkişaf etdiyi məmnunluqla qeyd edildi.

Nazirlər ikitərəfli münasibətlərin daha da genişləndirilməsi üçün mövcud imkanları nəzərdən keçirdilər. Onlar Prezident İlham Əliyevin ötən il İtaliyaya səfərinin, eləcə də İtaliya Prezidenti Sercio Mattarellanın bu ilin sentyabr ayında Azərbaycana rəsmi səfərinin siyasi dialoqu xeyli gücləndirdiyini xüsusi vurğuladılar. İtaliya Nazirlər Şurasının sədri Ciorcia Meloninin COP-29-da iştirakı, liderlər arasında mütəmadi görüşlərin keçirilməsi də müsbət hal kimi xatırlandı. Bu mübadilələr iki ölkənin bütün sektorlar üzrə əlaqələri dərinləşdirməyə sadiq olduğunu göstərir.

İqtisadi və sektoral əməkdaşlıq görüşün əsas müzakirə mövzularından biri idi. Xüsusilə, iki ölkə arasında enerji əməkdaşlığının strateji əhəmiyyəti vurğulandı. Bu sahədə həyata keçirilən genişmiqyaslı layihələrin Avropanın enerji təminatının etibarlılığında mühüm rol oynadığı diqqətə çatdırıldı. Nazirlər enerji, ticarət, nəqliyyat, mədəniyyət, təhsil və müdafiə sahələrində əlaqələrin genişləndirilməsi üçün potensialı dəyərləndirdilər. İtaliya-Azərbaycan Universitetinin yeni binasının açılışının böyük əhəmiyyət daşıdığı qeyd edildi. Təhsil sahəsindəki əməkdaşlıq strateji tərəfdaşlığın vacib sütunlarından birinə çevrilib.

Nazir Ceyhun Bayramov həmkarına Azərbaycan-Ermənistan normallaşma prosesi barədə ətraflı məlumat verdi. O, regionda sülh və sabitlik təşəbbüslərindən, habelə 8 avqust 2025-ci il tarixli Vaşinqton Birgə Bəyannaməsinin tarixi əhəmiyyəti və əldə olunmuş razılaşmalar haqqında danışdı. İtaliya şirkətlərinin Azərbaycanın azad edilmiş ərazilərində bərpa və yenidənqurma işlərində yaxından iştirak etməsi də məmnunluqla qeyd edildi. İki ölkə arasında beynəlxalq təşkilatlar, o cümlədən Avropa İttifaqı və digər çoxtərəfli platformalar çərçivəsində əməkdaşlığın əhəmiyyəti xüsusi vurğulandı. Gələn il ölkəmizdə keçiriləcək Ümumdünya Şəhərsalma Forumu çərçivəsində də birgə əməkdaşlıq imkanları nəzərdən keçirildi. Görüşdə Rusiya-Ukrayna münaqişəsi, Yaxın Şərqdəki vəziyyət kimi qarşılıqlı maraq doğuran digər regional və beynəlxalq məsələlər ətrafında fikir mübadiləsi aparılıb.