Azərbaycanda akkreditə olunmuş diplomatların Cəbrayıl və Zəngilan rayonlarına səfəri başlayıb

Azərbaycan Respublikası Prezidentinin tapşırığına əsasən, oktyabrın 31-də ölkədə akkreditə olunmuş səfirliklərin və beynəlxalq təşkilatların rəhbər şəxslərinin Cəbrayıl və Zəngilan rayonlarına səfəri başlayıb. Bu səfər diplomatik korpus nümayəndələrinin işğaldan azad edilmiş ərazilərə 20-ci gəlişidir. Bu gəliş geniş miqyaslıdır: səfərdə 51 ölkədən və 12 beynəlxalq təşkilatdan 100-dən artıq nümayəndə iştirak edir. Nümayəndə heyətinə Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev müşayiət edir.

Səfər zamanı diplomatik korpus nümayəndələri Cəbrayıl və Zəngilan rayonlarında aparılan bərpa və yenidənqurma işləri ilə yaxından tanış olurlar. Onlar "Böyük Qayıdış" Proqramı çərçivəsində uğurla icra edilən layihələr barədə məlumat alır, həmçinin regionun strateji əhəmiyyətini qaldıran Zəngəzur dəhlizi layihəsini öyrənirlər. Ağbənd qəsəbəsi ərazisindəki dəmir və avtomobil yolları ilə bağlı görülən işlərə baxış keçiriləcək. Nümayəndə heyəti əsas infrastruktur obyektlərini, o cümlədən Zəngilan rayonunda "Dost Aqropark" heyvandarlıq kompleksini və Həkəri dəmiryolu stansiyasını görəcək. Zəngilan şəhərindəki yaşayış kompleksi, məktəb, uşaq bağçası binaları və şəhər məscidinə baxış da səfər proqramına daxil edilib.

Diplomatik korpus nümayəndələrinin bu səfəri həyata keçirilən işlərin miqyasını və regionun inkişaf potensialını yerində görmək şansı yaradır. Bu gəliş, eyni zamanda, işğaldan azad edilmiş ərazilərin davamlı bərpası, sosial-iqtisadi dirçəlişi və reinteqrasiyasının təmin edilməsi istiqamətində Azərbaycanın səylərini dəyərləndirməyə imkan verir. Bu mühüm səfər ölkənin ərazilərin yenidən qurulmasına və inkişaf etdirilməsinə olan siyasi öhdəliyini göstərir.