Azərbaycanda Kosmik Aparatların İnkişafı Mərkəzinin tikintisinə başlanılacaq

Azərbaycanda Kosmik Aparatların İnkişafı Mərkəzinin tikintisinə yaxın aylarda start veriləcək. Rəqəmsal İnkişaf və Nəqliyyat Nazirliyi yanında Azərbaycan Kosmik Agentliyinin ("Azərkosmos") İdarə Heyətinin sədrinin vəzifələrini müvəqqəti icra edən Dunay Bədirxanov bu barədə məlumatı "Kosmosdan gələn imkanlar: Kosmik müşahidəmizin sosial-iqtisadi inkişafa töhfəsinin 10 ili" adlı tədbirdə açıqlayıb.

Bədirxanov bildirib ki, Azərbaycan yaxın gələcəkdə öz peyklərini istehsal etməyi planlayır. Bu mühüm məqsədə çatmaq üçün ilkin addımlar artıq atılıb. Misal üçün, "Azərkosmos"un Tədqiqat və İnkişaf üzrə komandası son bir il yarımdır ki, İsraildə intensiv təlimlərdən keçir. Onlar mürəkkəb siyasi şəraitə baxmayaraq, "Azersky-2" layihəsi çərçivəsində peykin istehsalı üzrə hazırlıqları davam etdirirlər.

O, Kosmik Aparatların İnkişafı Mərkəzinin qurulması ilə bağlı dizayn və layihələndirmə işlərinin yekunlaşdığını vurğulayıb. Bu mərkəz həm peyk istehsalı zavodu kimi xidmət edəcək, həm də istehsalata cəlb ediləcək işçilər üçün lazımi şəraiti təmin edəcək. Mərkəzin tikinti yeri artıq müəyyən olunub. Tikinti işlərinə yaxın aylarda başlamaq planlaşdırılır. Bundan başqa, Azərbaycan peykinin daşıyıcı raketi olaraq "SpaceX" şirkəti seçilib. Bu, texnoloji tərəfdaşlıq baxımından vacib addımdır.

Layihənin həyata keçirilməsini asanlaşdırmaq məqsədi ilə "Azərkosmos" tarixində ilk dəfə törəmə müəssisə yaradılıb. Bu törəmə müəssisə Kosmik Aparatların İstehsalı Mərkəzi – "Spacecraft Development and Production" MMC adlanır. Yeni MMC, kosmik aparatların istehsalı layihələrini daha səmərəli şəkildə icra etməyə dəstək göstərəcək.