Azərbaycanda son illərdə əldə olunan nailiyyətlər vahid səyin parlaq nümunəsidir - Almaniyadan olan səyyah

Almaniyadan olan səyyah Karl Kupfner Ağdam şəhərinə səfəri zamanı jurnalistlərə açıqlama verib. O qeyd edib ki, Azərbaycanın son illərdə baş verən hadisələri bir ölkənin ümumi məqsəd naminə səyləri birləşdirməklə nələrə nail ola biləcəyinin əla nümunəsidir. Kupfner bildirib ki, bu, onun Azərbaycana ilk səfəridir və belə qısa müddət ərzində gördükləri onu çox təsirləndirib.

Səyyah burada bir neçə gün keçirmək fürsətini səbirsizliklə gözlədiyini vurğulayıb. O, ölkə haqqında daha çox öyrənmək, ələlxüsus da Azərbaycan xalqının qonaqpərvərliyini qiymətləndirmək istədiyini deyib. Karl Kupfner səkkiz ölkədən olan səyahətçilər qrupunun tərkibində Azərbaycana gəlib. Bu qrupa “Extreme Traveler International Congress” (ETIC – Beynəlxalq Ekstremal Səyyahlar Konqresi) klubunun rəhbəri Kolya Sporin rəhbərlik edir.

Hazırda Ağdamda olan nümayəndə heyəti qarşıdakı günlərdə geniş marşrut üzrə hərəkət edəcək. Səyahətçilər Ağdam–Xankəndi–Laçın–Şuşa–Füzuli marşrutu üzrə iki günlük avtomobil səyahəti planlaşdırır. Bu səfər azad olunmuş ərazilərin “black tourism” (qara turizm) çərçivəsində tanıdılması və həyata keçirilən genişmiqyaslı tikinti və bərpa işlərinin nümayiş etdirilməsi məqsədi daşıyır. Bu, artıq 15-ci belə səfərdir. Məlumat üçün deyək ki, aparıcı beynəlxalq səyahətçi klubları 2021-2025-ci illərdə Qarabağ və Şərqi Zəngəzur bölgələrinə ümumilikdə 14 səfər təşkil etmişdi. Vahid səyin parlaq nümunəsi olan bu nailiyyətlər xarici qonaqların böyük marağına səbəb olur.