AzMİ-nin baş direktoru metrologiya üzrə beynəlxalq iclasda iştirak edib

Azərbaycan Metrologiya İnstitutunun (AzMİ) baş direktoru Xamis Seyranov Fransanın Sevr şəhərində keçirilən Çəkilər və Ölçülər üzrə Beynəlxalq Büronun (BIPM) 24-cü iclasına qatılıb. AzMİ, Azərbaycan Respublikası Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində fəaliyyət göstərir.

Bu iclasa dünyanın bir çox ölkələrindən, o cümlədən Amerika Birləşmiş Ştatları, Almaniya, Böyük Britaniya, Braziliya, Çin, Fransa, Türkiyə, Yaponiya, Özbəkistan və Yeni Zelandiya daxil olmaqla, üzv dövlətlərin milli metrologiya qurumlarından nümayəndələr qatılıblar. Təmsilçilər qlobal ölçmə standartlarının tətbiqi və inkişafı sahəsindəki son yenilikləri müzakirə etmək üçün bir araya gəldilər. Azərbaycan Metrologiya İnstitutu (AzMİ) üçün bu görüş, qlobal metrologiya proseslərində iştirak etmək və təcrübə mübadiləsi aparmaq baxımından böyük əhəmiyyət daşıyır.

İclas zamanı BIPM-in Çəkilər və Ölçülər üzrə Beynəlxalq Komitəsinin (CIPM) ötən il ərzindəki işləri barədə təqdimatlar dinlənildi. Metrik Konvensiyanın imzalanmasının 150 illiyi ilə əlaqədar həyata keçirilən tədbirlər barədə də məlumat verildi. Əsas müzakirələr metrologiya sahəsində süni intellektin və rəqəmsal texnologiyaların tətbiqi, CIPM strategiyasının icrası, beynəlxalq və regional əməkdaşlıqların vəziyyəti ətrafında cərəyan etdi. Həmçinin, saniyənin yeni metroloji tərifinin müəyyən edilməsi kimi mühüm texniki məsələlər də danışıldı.

Daha sonra nümayəndələrə bir sıra ixtisaslaşmış mövzularda təqdimatlar göstərildi. Bu təqdimatlar "Elektrik batareyalarının ölçülməsi sahəsində müasir yanaşmalar", "Ağıllı şəbəkə (Smart grid) xüsusiyyətləri", "Metrologiyada süni intellektin tətbiqi" və "Metrologiya və rəqəmsallaşma" mövzularını əhatə edirdi. Tədbirin çərçivəsində AzMİ nümayəndəsi BIPM-ə üzv olan bir sıra ölkələrin, xüsusən Türkiyə, Cənubi Koreya, Çin, Polşa və Özbəkistanın təmsilçiləri ilə ikitərəfli görüşlər keçirdi. Bu görüşlər zamanı gələcək qarşılıqlı əməkdaşlıq imkanları barədə fikir mübadiləsi aparıldı.