Bakıda evdə baş verən yanğında xəsarət alanların vəziyyəti açıqlanıb (YENİLƏNİB)

Bakının Nərimanov rayonunda fərdi yaşayış evində baş verən güclü yanğın nəticəsində iki nəfər müxtəlif dərəcəli yanıq xəsarətləri alıb. Hadisə 25.11.2025-ci il tarixində, səhər saat 04:50 radələrində qeydə alınıb. Respublika Təcili və Təxirəsalınmaz Tibbi Yardım Mərkəzinə çağırış daxil olduqdan sonra təcili yardım briqadası dərhal hadisə yerinə cəlb olunub.

TƏBİB-dən verilən məlumata görə, tibbi heyət hadisə yerində iki zərərçəkənə zəruri ilkin yardım göstərib. Hər iki şəxs bədənin müxtəlif nahiyələrinin yanığı diaqnozu ilə Yanıq Mərkəzinə hospitalizasiya olunub. Bu məlumat saat 09:38-də yenilənib. Yanğının baş verməsi barədə məlumat eyni zamanda Fövqəladə Hallar Nazirliyinin (FHN) “112” qaynar telefon xəttinə də daxil olub. Məlumatda hadisə yerinin Nərimanov rayonu, 2-ci Şimal küçəsindəki fərdi yaşayış evi olduğu bildirilib.

Məlumatla əlaqədar FHN-in Dövlət Yanğından Mühafizə Xidmətinin qüvvələri əraziyə cəlb edilib. Yanğınsöndürənlərin çevik müdaxiləsi ilə ümumi sahəsi 900 kvadratmetr olan ikimərtəbəli evdə alovun daha geniş sahəyə yayılmasının qarşısı alınıb. Onlar həmçinin yanğının bitişik tikilən evlərə keçməsinə imkan verməyiblər. Yanğın nəticəsində fərdi yaşayış evinin ikinci mərtəbəsinin yanar konstruksiyaları və dam örtüyü 320 kvadratmetr sahədə yanıb. Evin qalan hissəsi və qonşuluqdakı tikililər yanğından mühafizə olunaraq xilas edilib.