Bakıda qucağında azyaşlı maşın sürən şəxs qəza törədib, uşaq ölüb

Bakının Zabrat qəsəbəsində dəhşətli yol qəzası baş verib. Bir ata həyətində azyaşlı övladı qucağında avtomobil idarə edərkən ağır nəticəli hadisəyə səbəb olub. Hadisə ötən gün qeydə alınıb. Qəza nəticəsində sürücünün azyaşlı oğlu həlak olub, atanın özü isə ağır vəziyyətdə xəstəxanaya yerləşdirilib.

Məlumatlara görə, hadisə qəsəbə sakini 1992-ci il təvəllüdlü Tural Süleymanovun yaşadığı evin həyətində baş verib. O, "BMW" markalı avtomobillə hərəkət edirdi. Sürücü maşını idarə edərkən qucağında 2018-ci il təvəllüdlü oğlu var idi. Avtomobil hərəkətdə olduğu zaman uşaq sürüşüb və təsadüfən sürət pedalına sıxılıb. Nəticədə avtomobil nəzarətdən çıxaraq sürətlə hasara çırpılıb.

Qəza nəticəsində azyaşlı U. Süleymanlı hadisə yerindəcə dünyasını dəyişib. Sürücü T. Süleymanov dərhal xəstəxanaya aparılıb. Həkimlər onun vəziyyətini ağır kimi qiymətləndirirlər. Faktla bağlı hüquqi araşdırmalara başlanılıb. Baş vermiş faciə ilə əlaqədar Cinayət Məcəlləsinin 263-cü maddəsi ilə cinayət işi açılıb, istintaq davam edir.