Bakıda xadimə çalışdığı evdən 5 min manatlıq qızıl oğurlayıb

Paytaxtın Yasamal rayonunda böyük dəyərdə oğurluq hadisəsi qeydə alınıb. Bir vətəndaş polisə müraciət edərək evindən 5000 manatlıq qızıl-zinət əşyasının və 220 manat pulunun talandığını bildirib. Polis əməkdaşları dərhal hadisə ilə bağlı araşdırmalara başlayıblar.

Keçirilən əməliyyat tədbirləri nəticəsində əməli törətməkdə şübhəli bilinən 43 yaşlı S. Dadaşova müəyyən olunaraq saxlanılıb. Aparılan ilkin araşdırmalar göstərir ki, qadın məhz xadimə kimi çalışdığı evdən oğurluğu həyata keçirib. O, qızıl-zinət əşyalarını noyabr ayının 1-dən 25-dək olan müddətdə, hissə-hissə götürdüyü müəyyən edilib.

Rayon ərazisində aparılan başqa bir tədbir zamanı fərqli bir oğurluq faktı ilə bağlı daha bir nəfər saxlanılıb. Zərərçəkənin cibindən 1882 manat pul talamaqda şübhəli bilinən 25 yaşlı S. Salmanzadə də polis tərəfindən müəyyən edilərək saxlanılıb. Hər iki faktla bağlı araşdırmalar davam edir. Polis məsələlərin bütün təfərrüatlarını aydınlaşdırır.