Bayden xərçəng xəstəliyindən müalicə kursunu tamamlayıb

ABŞ-nin keçmiş prezidenti Co Bayden oktyabrın 20-də prostat vəzi xərçəngi xəstəliyinə qarşı aparılan şüa terapiyasını başa vurub. Bu barədə məlumatı CBS telekanalı keçmiş prezidentin sözçüsü Kelli Skalliyə istinadən yayıb. Qeyd edilir ki, 82 yaşlı siyasətçi bu müalicəni Filadelfiyadakı xərçəng xəstəliyinin müalicəsi mərkəzində alıb.

Lakin bu addım onun müalicəsinin sonu demək deyil. Hazırda ABŞ-nin keçmiş liderinin əlavə müalicəyə ehtiyac duyub-duymayacağı hələlik bəlli deyil. Baydenin prostat xərçəngi müalicəsinin yeni mərhələsinə başladığı oktyabrın 11-də açıqlanmışdı. Bu mərhələ radiasiya terapiyası və hormonal terapiyanı əhatə edirdi.

Co Baydenə bu ilin may ayında prostat xərçəngi diaqnozu qoyulub. Həmin xəstəliyin aqressiv olduğu və sümüklərə yayıldığı bildirilmişdi. Diaqnoz həkimlər keçmiş prezidenti sidiklə bağlı problemlər səbəbilə müayinə etdikdən sonra qoyulub. Həmin müayinə zamanı onun prostat vəzində əlavə müayinə tələb edən "kiçik düyün" aşkarlanmışdı.