Bəzi QHT-lərin adlarında orfoqrafik səhvlərə yol verilib - Sevda Tahirli

Mirzə Ələkbər Sabir Fondunun sədri Sevda Tahirli Qeyri-Hökumət Təşkilatlarının (QHT) adlarının qeydiyyatında yol verilən ciddi nöqsanlara diqqət çəkib. O, bu gün QHT-lərə Dövlət Dəstəyi Agentliyinin təşkil etdiyi "Qərbi Azərbaycana qayıdış" mövzusunda ictimai müzakirədə çıxış edib.

Tahirli bildirib ki, müxtəlif dövrlərdə dövlət qeydiyyatına alınmış bəzi QHT-lərin adlarında orfoqrafik səhvlər, həmçinin ifadə və işarə xətaları mövcuddur. Bu, uzun müddətdən bəri davam edən bir problemdir və ana dilinin qorunması baxımından əhəmiyyət daşıyır. Eyni zamanda, təşkilatların bir çoxunun adları bir-birinə çox bənzəyir. Bu oxşarlıq, bəzən onların fəaliyyətini dəqiq şəkildə ayırd etməyi və ictimaiyyət üçün onları fərqləndirməyi çətinləşdirir.

QHT sədri qeyd edib ki, bu vəziyyətin düzəldilməsi üçün təşkilatlar aktiv addımlar atmalıdırlar. O, hər bir QHT-nin öz adına yenidən baxmasını məsləhət görüb. Əgər adlarda səhvlər və ya qeyri-dəqiqliklər aşkarlanarsa, zəruri dəyişikliklərin edilməsi üçün təşkilatlar aidiyyəti üzrə Ədliyyə Nazirliyinə müraciət etməlidirlər.

Sevda Tahirli bu təklifin icrasını vacib hesab edir. O bildirib ki, adlarda edilən bu tip düzəlişlər ana dilinə özünəməxsus töhfə verəcək. Bu həm də digər təşkilatlar üçün yaxşı bir nümunə yaradacaq, təşkilatların fəaliyyətlərini daha şəffaf və rəsmi sənədləşmə baxımından daha düzgün edəcək.