Binəqədidə avtomobil qaçıran və evdən oğurluq edənlər saxlanılıblar

Bakı şəhərinin Binəqədi rayonunda iki ayrı cinayət hadisəsi ilə əlaqədar şübhəli şəxslər polis əməkdaşları tərəfindən yaxalanıb. Rayon sakini polisə müraciət edərək "Tofaş" markalı avtomobilinin naməlum şəraitdə oğurlandığını bildirmişdi. Daxili İşlər Nazirliyinin (DİN) məlumatına görə, Binəqədi Rayon Polis İdarəsinin 4-cü Polis Şöbəsinin əməkdaşları hadisə ilə bağlı tədbirlər görməyə başlayıb.

Keçirilən əməliyyat tədbiri nəticəsində, avtomobili qaçırmaqda şübhəli bilinən şəxs saxlanılıb. Həmin şəxs əvvəllər məhkum olunmuş, 41 yaşlı S.Əliyevdir. O, oğurladığı nəqliyyat vasitəsini idarə edərkən tutulub. Nəqliyyat vasitəsi sahibinə geri qaytarılıb. Avtomobilin qaçırılması faktı ilə bağlı araşdırmalar davam edir.

Şöbə əməkdaşları tərəfindən başqa bir əməliyyat da keçirilib. Bu əməliyyat zamanı rayonun Biləcəri qəsəbəsi ərazisindəki evlərin birindən oğurluq etməkdə şübhəli bilinən 18 yaşlı Ə.Mürsəlov tutulub. Ə.Mürsəlovun 2800 manat dəyərində məişət əşyaları oğurladığı bildirilir. Hər iki cinayət faktı üzrə hüquq-mühafizə orqanları tərəfindən müvafiq araşdırmalar aparılır.