BMT-nin Baş katibi Kiyevdə Azərbaycan səfirliyinə raket zərbəsini pisləyib

BMT-nin Baş katibi Antonio Quterreş Ukraynanın paytaxtı Kiyev şəhərində Azərbaycanın səfirliyinin binasının növbəti dəfə raket zərbəsinə məruz qalmasını pisləyib. Baş katib, ümumiyyətlə, Rusiya Federasiyasının Ukraynanın bir sıra bölgələrinə endirdiyi irimiqyaslı raket və dron zərbələrini kəskin şəkildə pisləyir.

Bu məlumat Baş katibin sözçüsü Stefan Düjarrik adından yayılan bəyanatda yer alıb. Bəyanata görə, hücumlar nəticəsində mülki əhali arasında çoxsaylı xəsarətlər baş verib; Kiyevdə ən azı altı nəfər və Çornomorsk şəhərində iki nəfər həlak olub. Bundan əlavə, yaşayış və enerji infrastrukturuna, habelə **Azərbaycan Respublikasının Kiyevdəki səfirliyinə** ziyan dəydiyi bildirilir.

Quterreş qeyd edib ki, mülki əhaliyə və infrastruktura qarşı hücumlar beynəlxalq humanitar hüququ pozur. O, bu cür hərəkətlərin harada baş verməsindən asılı olmayaraq qəbuledilməz olduğunu və dərhal dayandırılmalı olduğunu vurğulayıb. Baş katib, həmçinin, diplomatik binaların toxunulmazlığı prinsipini xatırladır.

Sonda, Baş katib Ukraynada ədalətli, hərtərəfli və davamlı sülhə doğru ilk addım kimi tam, dərhal və qeyd-şərtsiz atəşkəs çağırışını təkrarlayıb. BMT Nizamnaməsinə, beynəlxalq hüquqa və təşkilatın müvafiq qətnamələrinə uyğun olaraq, Quterreş Ukraynanın beynəlxalq səviyyədə tanınmış sərhədləri daxilində **suverenliyini, müstəqilliyini və ərazi bütövlüyünü** tam şəkildə müdafiə edir.