bp Azərbaycanda psixoloji reabilitasiya sahəsində təhsilə dəstək verib

Bakı. BP şirkəti növbəti beynəlxalq elmi vəsaitin Azərbaycan dilinə tərcüməsini təqdim etdi. Bu addımla, bp-nin dünyanın qabaqcıl akademik resurslarını Azərbaycana gətirmək məqsədi ilə nəşr etdiyi kitabların ümumi sayı 30-a çatıb. Bu layihə, şirkətin yerli universitetlərə dünyada tanınan akademik materiallara, bilik və təcrübələrə çıxış imkanı təmin etməklə tədris prosesini gücləndirməyə yönəlmiş geniş təhsil proqramının hissəsidir.

Bu, bp-nin ölkədə ümumilikdə təhsilin inkişafına dəstək olmaq barədə uzunmüddətli öhdəliyi çərçivəsində atılan növbəti əhəmiyyətli addımdır. Yeni tərcümə edilən kitab “PTSP hallarında koqnitiv işlənmə terapiyası: Müfəssəl vəsait” adlanır. O, posttravmatik stres pozuntusu (PTSP) halları zamanı koqnitiv işlənmə terapiyası (KİT) sahəsində çalışan mütəxəssislər üçün nəzərdə tutulub. Patrisiya A. Resik, Kendis M. Monson və Ketlin M. Çard tərəfindən yazılan bu kitab psixologiya fakültələri və stres travmasının reabilitasiyası ilə məşğul olan səhiyyə təşkilatları üçün dəyərli bir resurs kimi tövsiyə edilir.

KİT beynəlxalq səviyyədə PTSP-nin müalicəsi üçün qabaqcıl praktikaya çevrilmiş bir metod kimi tanınır. Artıq bu metod Azərbaycanda da travma hallarında psixoloji yardım üzrə ixtisaslaşan peşəkar psixoloqların hazırlanması üçün istifadə olunur. Kitab KİT metodunun müharibə veteranları da daxil olmaqla spesifik qruplara uyğunlaşdırılmasına yönəlib. Bu yanaşma, Azərbaycanda müharibə stresi ilə bağlı travmalar məsələsinin həlli baxımından kitabı xüsusilə aktual edir.

bp-nin Xəzər regionu üzrə vitse-prezidenti Bəxtiyar Aslanbəyli layihə haqqında danışdı. O bildirdi ki, bu kitab müharibə stresi və digər stres travmalarından əziyyət çəkən insanların reabilitasiyası üçün çox vacib mənbədir. "Kitabın nəşrinə dəstək verməklə, biz Azərbaycanda psixoloji reabilitasiyanın, xüsusən də emosional və psixoloji travma yaşamış insanların əqli sağlamlığının reabilitasiyasının sürətləndirilməsinə kömək etmək istədik," Aslanbəyli dedi. Bu nəşr stres travması yaşayan insanlarla işləyən mütəxəssislərin bilik və bacarıqlarının daha da artırılmasına, eləcə də PTSP-u olan şəxslər və onların ailə üzvlərinin maariflənməsinə kömək edəcək.

Bu kitabın tərcüməsi və nəşri təşəbbüsü “For Azerbaijan” adlı beynəlxalq xeyriyyə təşkilatı tərəfindən icra edilən geniş “Azərbaycanda Psixoloji Reabilitasiya Potensialının Gücləndirilməsi” layihəsinin bir parçasıdır. Layihə həssas qruplar üçün dayanıqlı həllər təmin etmək məqsədi daşıyır. Kitabın tərcümə və nəşr xərcləri üçün bp-nin maliyyə dəstəyi 19,700 AZN təşkil edib. Kitab bp tərəfindən təhsil müəssisələrinə, psixologiya fakültələrinə və stres travması reabilitasiyası ilə məşğul olan tibb müəssisələrinə hədiyyədir.