Bu ölkədə gələn il aviareyslərin sayı xeyli azalacaq

Gələn il Almaniyada aviareyslərin sayında ciddi azalmaların olacağı gözlənilir. Ölkənin yerli KİV-lərinin yaydığı məlumata görə, “Lufthansa”, “Eurowings”, “Ryanair” və digər hava şirkətləri bu kəsintiləri həyata keçirəcək. Şirkətlər artan vergilər, əlavə rüsumlar və aşağı rentabelliklə əlaqədar olaraq daxili və beynəlxalq reyslərin bir hissəsini ləğv etmək qərarına gəliblər. Bu addım şirkətlərin maliyyə yükünü azaltmaq məqsədi daşıyır.

Xüsusilə “Lufthansa” daxili uçuşlarda böyük ixtisarlar planlaşdırır. Hər həftə Frankfurt və Münxen mərkəzli 50 uçuş dayandırılacaq. Bu qərarlar ölkənin əsas hava nəqliyyatı qovşaqlarına birbaşa təsir göstərəcək. Bundan əlavə, iki beynəlxalq marşrut tamamilə ləğv ediləcək. Bunlar Frankfurt-Tuluza və Münxen-Tallin xətləridir. Hava yollarındakı bu azalmalar hava nəqliyyatı sahəsinə ciddi təsir göstərir.

Kiçik hava limanları da uçuşların azaldılmasından təsirlənəcək. Bremen, Drezden, Köln, Leypziq, Münster, Nürnberq və Ştutqart kimi şəhərlərdə reyslərin sayında azalma gözlənilir. Eyni zamanda, “Ryanair” artıq öz kəsintilərini həyata keçirib. Aviaşirkət qış planı çərçivəsində Almaniyada 9 hava limanı üzrə 24 marşrutu ləğv etdi. Şirkət həmçinin Hamburq hava limanındakı uçuşları 60 faiz azaldıb. Bütün bu kəsintilər, şirkətlərin maliyyə vəziyyətini yaxşılaşdırmaq üçün atdığı zəruri addımlardır.