Deputat dövlət xidmətlərinə görə rüsumla yanaşı əlavə haqqın alınmasını düzgün saymır

Milli Məclisdə “Dövlət xidmətləri haqqında” qanun layihəsinin müzakirəsi zamanı dövlət xidmətlərinə görə rüsumla yanaşı əlavə haqqın alınması məsələsi ciddi mübahisəyə səbəb oldu. Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Qüdrət Həsənquliyev bu cür əlavə ödənişlərin tətbiqini düzgün saymır. O, parlamentin iclasında bildirib ki, rüsum onsuz da göstərilən xidmətlərə görə ödənilən haqdır. Əgər dövlət orqanı göstərdiyi xidmətə görə rüsumdan başqa bir haqq alırsa, bu, artıq onu kommersiya təşkilatına çevirir. Deputat qeyd edir ki, bu halda həmin dövlət qurumu vergilərə cəlb edilməlidir.

Həsənquliyev, ölkənin maliyyə ehtiyaclarının olduğunu başa düşdüyünü, lakin pul toplama metodunun yanlış olduğunu vurğulayıb. Onun fikrincə, büdcə gəlirlərini artırmaq üçün başqa yollar seçilməlidir. Əsas məqsəd ölkə iqtisadiyyatının inkişafı olmalıdır. Bu inkişafa nail olmaq üçün biz qanunun aliliyini, mülkiyyət toxunulmazlığını təmin etməli və investisiyalara yönəlik, əlverişli biznes mühiti yaratmalıyıq. Deputat əlavə edib ki, dövlət orqanlarını büdcədən lazımi səviyyədə maliyyələşdirməyin ən səmərəli yolu budur. O, fiziki və hüquqi şəxslərdən dövlət orqanının göstərdiyi xidmətə görə rüsumdan əlavə haqq almasının Konstitusiyaya zidd olduğunu açıqlayıb.

Milli Məclisin sədr müavini Ziyafət Əsgərov isə bu iradlara cavab verib. Əsgərov qanun layihəsini diqqətlə oxuduğunu bildirib. O, Həsənquliyevdən əlavə haqq alınmasının Konstitusiyanın hansı konkret maddəsinin hansı hissəsinə uyğun gəlmədiyini dəqiq qeyd etməsini istəyib. Ziyafət Əsgərovun sözlərinə görə, qanun layihəsində söhbət dövlət xidmətlərinin göstərilməsi zamanı qanunla müəyyən edilmiş hallardan gedir. O əlavə edib ki, əgər bu yeni qanunla "Dövlət rüsumları haqqında" qanun arasında hər hansı ziddiyyət yaranarsa, onlar bir-birinə uyğunlaşdırılacaq. Sədr müavini layihənin Konstitusiyaya zidd olmadığı qənaətindədir.