Dörd işçinin ölümündə təqsirləndirilən "Lake Hotel"in icarədarı həbs edilib

Paytaxtın Binəqədi rayonunda yerləşən "Lake Hotel"də dörd işçinin elektrik cərəyanı vurması nəticəsində həlak olması ilə bağlı başlanan cinayət işində otelin icarədarı Ağasif Verdiyev həbs edilib. Baş Prokurorluğun məlumatına görə, hadisə noyabrın 21-də Xırdalan–Binəqədi şossesindəki oteldə işləyən dörd gəncin ölümü ilə nəticələnib.

Həyatını itirənlər 1997-ci il təvəllüdlü Cavidan Muradlı, 2005-ci il təvəllüdlü Emil Quliyev, 2006-cı il təvəllüdlü Eltac Əliyev və 2007-ci il təvəllüdlü Əkbər Zeynalovdur. Bu faciə ilə əlaqədar Binəqədi rayon prokurorluğunda Cinayət Məcəlləsinin 162.3-cü maddəsi ilə cinayət işi açılıb. Həmin maddə əmək mühafizəsi qaydalarının pozulması ehtiyatsızlıqdan iki və daha çox şəxsin ölümünə səbəb olduqda tətbiq edilir.

Toplanmış sübutlar göstərir ki, Lake Hotelin icarədarı olan Ağasif Verdiyev elektrik şəbəkəsinin mühafizə zonası ərazisində işlər planlaşdırıb və həyata keçirib. Bu işlər zamanı o, texniki təhlükəsizlik və əmək mühafizəsi qaydalarını pozmaqda şübhəli bilinir. Məlum olub ki, bu pozuntular Nazirlər Kabinetinin 16 may 2024-cü il tarixli Qərarı ilə təsdiq edilmiş "Elektrik şəbəkələrinin mühafizə zonalarının ölçüləri və həmin ərazilərdə təsərrüfat işlərinin aparılmasına dair Tələblər"ə, eləcə də digər normativ aktlara zidd olub.

A. Verdiyev noyabrın 21-də rayon prokurorluğu tərəfindən şübhəli şəxs qismində saxlanılıb. Növbəti gün, yəni noyabrın 22-də, ona Cinayət Məcəlləsinin 162.3-cü maddəsi ilə ittiham elan edilib. İstintaq orqanının vəsatəti və prokurorun təqdimatı əsasında Bakı şəhəri Binəqədi Rayon Məhkəməsinin qərarı ilə A. Verdiyev barəsində həbs qətimkan tədbiri seçilib. Hazırda cinayət işi üzrə ilkin istintaq davam etdirilir. Hadisədə təqsirli olan bütün şəxslərin müəyyən edilməsi və məsuliyyətə cəlb olunmaları üçün lazımi tədbirlər görülür. Nəticə barədə ictimaiyyətə əlavə məlumat veriləcək.