Ədliyyə Nazirliyi 200-dən çox gənci könüllü fəaliyyətə cəlb edib

Ədliyyə Nazirliyi (ƏN) genişləndirilmiş könüllü proqramı çərçivəsində 200-dən çox gənci fəaliyyətə cəlb etdiyini açıqlayıb. Bu məlumatı ədliyyə nazirinin müavini Toğrul Hüseynov Azərbaycan Könüllülərinin VIII Həmrəylik Forumunda səsləndirib. Nazirlik artıq 15 fərqli fəaliyyət sahəsində könüllü təcrübə proqramını tətbiq edir. Bu təşəbbüs gənclərə Nazirliyin müxtəlif departamentlərinin iş prinsipləri ilə tanış olmaq imkanı verir.

Nazir müavininin sözlərinə görə, ƏN könüllüləri media, icra, kargüzarlıq, insan resursları və digər mühüm istiqamətlər üzrə fəaliyyətlərə cəlb edir. Proqramın əsas məqsədlərindən biri hər bir gəncə ayrılan müddət ərzində səmərəli yanaşmanı təmin etməkdir. Onlara, nazirlik əməkdaşları ilə bərabər müxtəlif istiqamətlər üzrə fəaliyyətlərdə iştirak üçün lazımi şərait yaradılır. Beləliklə, gənclər 15 fərqli fəaliyyət sahəsi üzrə praktiki bilik və iş təcrübəsi qazanırlar.