Əfqan Sadıqov 14 sutkalıq həbs olunub

Jurnalist Əfqan Sadıqov on dörd sutkalıq həbs cəzası alıb. Bu qərarı Tbilisi Şəhər Məhkəməsi çıxarıb. Məhkəmə onu oktyabrın 18-də Tbilisidə keçirilən aksiyada iştirak edərkən yolu qanunsuz olaraq bağlamaqda təqsirli bilib. Bu hadisədən sonra Əfqan Sadıqovun saxlanılması barədə məlumatlar yayılmışdı.

Qeyd edək ki, "Azel TV"nin təsisçisi və baş redaktoru olan Sadıqovun Gürcüstandakı məhkəmə prosesləri keçən ildən başlayıb. O, ilk dəfə ötən il avqustun 3-də həbs olunmuşdu. Həmin ilin noyabrında Tbilisi Şəhər Məhkəməsi onun Azərbaycana ekstradisiyası barədə qərar vermişdi.

Lakin bu il aprelin 16-da məhkəmə onu girov müqabilində azadlığa buraxmışdı. O zaman Sadıqov 5 min lari məbləğində girov qarşılığında sərbəst qalmışdı. Hazırda isə o, inzibati xətaya görə 14 sutkalıq həbs cəzası çəkir.