Ekspert: Süni intellekt və rəqəmsal innovasiyalar redaksiyaların işini transformasiya edir

Süni intellekt (AI) və rəqəmsal yeniliklər redaksiyaların işini köklü şəkildə dəyişir. Rəqəmsal biznes və media üzrə indoneziyalı ekspert Ferdian Bakıda keçirilən "Dialoqun, əməkdaşlığın və regional həmrəyliyin təşviq edilməsi" mövzusunda D-8 Media Forumunda bu barədə danışıb.

Onun sözlərinə görə, rəqəmsal dəyişikliklər və AI artıq gələcək deyil. Onlar gündəlik həyatın ayrılmaz hissəsi olub. Ekspert qeyd edir ki, AI redaksiya işini üç əsas istiqamətdə transformasiya edir. Birinci istiqamət məlumatın aşkarlanması və dəqiqləşdirilməsi ilə bağlıdır. Əvvəllər bir xəbərin hazırlanması üçün beş saata qədər vaxt lazım gəlirdisə, indi AI sayəsində bunu cəmi beş dəqiqəyə etmək mümkündür. Süni intellekt məlumatları, şəkilləri və mətnləri emal edir, sosial şəbəkələri təhlil edir, trendləri müəyyənləşdirir. Həmçinin auditoriyanın cəlb olunma səviyyəsini qiymətləndirir və hətta potensial təhlükəli kontenti tapır.

Ferdianın fikrincə, ikinci vacib sahə proseslərin avtomatlaşdırılmasıdır. AI redaksiyanın iş proseslərini tənzimləməyə kömək edir, materialların fərqli dillərdə tərcüməsini, ümumiləşdirilməsini və yenidən yazılmasını avtomatlaşdırır. Bu, jurnalistlərə daha çox təhlilə və kontekstə diqqət ayırmaq imkanı verir. Üçüncü istiqamət isə kontentin həqiqiliyi məsələsidir. Süni intellekt materialın kim tərəfindən və nə vaxt yaradıldığını, orijinal olub-olmadığını, yaxud redaktə edilib-edilmədiyini izləməyə imkan verir.

Texnologiya eyni zamanda özü də kontent yarada bilir. Bu xüsusiyyət ciddi insan nəzarəti tələb edir. AI və jurnalistlərin peşəkar fəaliyyəti redaksiyaların transformasiyasını gücləndirir. Bu birləşmə media məhsullarının effektivliyini və keyfiyyətini artırır, gələcək redaksiya işi üçün yeni standartlar müəyyən edir.