Əmanətlərin Sığortalanması Fondunda Zəfər Gününə həsr olunmuş tədbir keçirilib

8 Noyabr - Zəfər Günü münasibətilə Əmanətlərin Sığortalanması Fondunda (ƏSF) təntənəli mərasim keçirildi. Bu gün Azərbaycanın dövlətçilik tarixində xüsusi yer tutur; o, xalqın milli iradəsini, dövlət-xalq birliyini və Qəhrəman Ordumuzun gücünü bütün dünyaya göstərir. 2020-ci ilin payızında Ali Baş Komandan İlham Əliyevin rəhbərliyi ilə Azərbaycan Ordusu 44 günlük Vətən müharibəsində böyük qələbə qazandı. Nəticədə ölkəmizin ərazi bütövlüyü bərpa olundu və torpaqlarımız işğaldan azad edildi. Bu tarixi hadisə Azərbaycan xalqının azadlıq, ədalət və milli qürur hissi uğrunda apardığı mübarizənin möhtəşəm təntənəsidir.

Tədbir şəhidlərimizin əziz xatirəsinin bir dəqiqəlik sükutla yad edilməsi ilə başladı. Daha sonra Fondun İcraçı direktorunun müavini Bəhruz Qayıbov iştirakçılara müraciət etdi. O, Zəfər Gününün Azərbaycan tarixindəki müstəsna əhəmiyyətini vurğuladı. B. Qayıbov bildirdi ki, 8 Noyabr xalqımızın illərlə arzuladığı ədalətin bərpası, torpaqların işğaldan azad olunması və dövlətin ərazi bütövlüyünün təmin edilməsi ilə nəticələnən Qələbə günüdür. O qeyd etdi ki, bu tarixi nailiyyət Prezident, Müzəffər Ali Baş Komandan İlham Əliyevin müdrik rəhbərliyi, ordunun rəşadəti və xalqımızın sarsılmaz birliyi sayəsində mümkün oldu.

B. Qayıbov çıxışında bu qələbənin təkcə hərbi deyil, həm də mənəvi-siyasi bir Zəfər olduğunu söylədi. O qeyd etdi ki, 8 Noyabr xalqımızın birlik, iradə və milli həmrəyliyinin simvoludur. Bu gün gələcək nəsillər üçün vətənpərvərlik məktəbi sayılır. B. Qayıbov əlavə etdi ki, hər bir azərbaycanlı qalib xalqın nümayəndəsi olmaqdan qürur duyur, şəhidlərimizin göstərdiyi qəhrəmanlıq Azərbaycan tarixində əbədi yaşayacaq. Tədbir çərçivəsində Vətən müharibəsində iştirak etmiş Fond əməkdaşları öz döyüş xatirələrini bölüşdülər. Onlar xidmət etdikləri istiqamətlər və keçdikləri ön cəbhəxətləri barədə danışdılar. Qazilər dövlətin onlara və müharibə iştirakçılarına göstərdiyi diqqət və qayğının yüksək dəyərləndirildiyini bildirdilər.

Tədbirin sonunda Fondun rəhbərliyi müharibə iştirakçısı olan əməkdaşları xüsusi hədiyyələrlə təltif etdi. Rəhbərlik Fond kollektivi adından onların göstərdiyi şücaətə görə dərin minnətdarlığını ifadə etdi. Əmanətlərin Sığortalanması Fondu bu əlamətdar gündə bütün Azərbaycan xalqını Zəfər Günü münasibətilə təbrik edir. Fond şəhidlərimizin xatirəsini ehtiramla yad edir və qazilərimizə möhkəm can sağlığı və uzun ömür arzulayır. Zəfər bizimlədir, Qarabağ Azərbaycandır!