Ərdoğan BMT Təhlükəsizlik Şurasının qərar qəbulu sisteminin ədalətsizliyindən gileylənib

Türkiyə Prezidenti Rəcəb Tayyip Ərdoğan Birləşmiş Millətlər Təşkilatının Təhlükəsizlik Şurasındakı (BMT TŞ) qərar qəbul etmə mexanizmini tənqid edib. O, İstanbulda keçirilən “TRT World Forum”da çıxışı zamanı bildirib ki, bu sistemdəki ədalətsizlik qlobal miqyaslı çətinliklərin həll edilməsinə mane olur. Prezidentin sözlərinə görə, mövcud vəziyyət dünya sisteminin yenidən qurulmasının zəruriliyini bir daha göstərir.

Ərdoğan qeyd edib ki, bəşəriyyətin yaşadığı hər bir gün daha ədalətli, daha inklüziv və daha əhatəli bir qlobal sistemin yaradılmasının vacib olduğunu sübut edir. Müharibələr, münaqişələr, bərabərsizlik və ədalətsizlik halları hazırda faktiki olaraq bəşəriyyətin gündəmini zəbt edib. Bu problemlərin geniş yayılması beynəlxalq qurumların öz missiyasını yetərincə yerinə yetirə bilməməsinin nəticəsidir.

Mövcud BMT sistemi İkinci Dünya müharibəsinin qalibləri tərəfindən qurulub. Təəssüf ki, bu köhnə quruluş indiki dövrün reallıqlarına və tələblərinə cavab vermir. Ərdoğan fikrini belə yekunlaşdırıb ki, BMT Təhlükəsizlik Şurasında qərarların qəbul olunmasının ədalətsiz quruluşu səbəbindən bəşəriyyətin problemlərinə həll tapmaq mümkün olmur. Bu struktur islahatlara ehtiyacı olan qlobal idarəetmənin ən böyük çatışmazlıqlarından biridir.