Ermənistanda müxalif bloqerlər iki ay müddətinə həbs edilib

Ermənistanda hökuməti və Baş nazir Nikol Paşinyanı sərt tənqid edən müxalif bloqerlər Narek Samsonyan və Vazgen Saqatelyan məhkəmə qərarı ilə iki ay müddətinə həbs ediliblər. Bu şəxslər "İmnemnimi" adlı verilişin həm həmmüəllifləri, həm də aparıcılarıdırlar. Onların vəkilləri bu qərar barədə sosial şəbəkələrdə məlumat yayıblar.

Bu qərar bloqerlərin noyabrın 13-də səhər tezdən saxlanılmasından sonra verilib. Həmin gün hüquq-mühafizə orqanlarının əməkdaşları hər iki şəxsin evlərində axtarış aparmışdılar. Samsonyan və Saqatelyan rəsmən xuliqanlıq ittihamı ilə saxlanılıblar. Qeyd olunur ki, bu ittiham Ermənistan Parlamentinin spikeri Alen Simonyanın bəyanatına əsaslanırdı.

Vazgen Saqatelyanın vəkili Arsen Babayan bildirib ki, Roman Smbatyanın sədrliyi ilə keçirilən məhkəmə müstəntiqin vəsatətini təmin etdi. Beləliklə, məhkəmə Saqatelyanın iki ay müddətinə həbsdə saxlanılması barədə qərar çıxardı. Vəkil məhkəmənin bu qərarından Apelyasiya Məhkəməsinə şikayət veriləcəyini də əlavə etdi.

Narek Samsonyanın vəkili Ruben Melikyan da öz müştərisi barəsində oxşar məhkəməyəqədər həbs tədbirinin tətbiq edildiyini təsdiqlədi. Melikyan qeyd edib ki, məhkəmə Samsonyanın da iki ay müddətinə həbsdə saxlanılması barədə qərar qəbul edib. O, Vazgen Saqatelyana da eyni tədbirin tətbiq olunduğunu bildiyini söyləyib. Vəkilin sözlərinə görə, məhkəmənin qərarında gözlənilməz heç nə yox idi.