"Fənərbağça"nın futbolçusu məhkəməyə verildi

Film və teleserial istehsalı ilə məşğul olan "Warner Bros" şirkəti “Fənərbağça”nın yarımmüdafiəçisi Kerem Aktürkoğlunu məhkəməyə verib. Hollivud şirkəti futbolçuya sehrbaz Harri Potter haqqında filmlər seriyasından vizual və audio elementlərdən icazəsiz istifadə etdiyinə görə iddia qaldırıb. Bu müəllif hüquqları iddiası İstanbul Mülki Məhkəməsinə təqdim olunub. Aktürkoğlunun sosial şəbəkə paylaşımlarından toplanmış nümunələr iddia sənədinə əlavə edilib.

Şirkət bildirir ki, futbolçu qollarını qeyd edərkən özünü Harri Potter filmlərindəki kimi, sehr çubuğu ilə bir sehrbaz kimi göstərir. İddiada göstərilir ki, Kerem Aktürkoğlu paylaşımlarında bu əmtəə nişanlarına birbaşa istinadlar edib. Məsələn, o, sosial media paylaşımlarında filmlərdəki Bukli adlı bayquşun musiqi temasından istifadə edib. "Warner Bros" qeyd edir ki, futbolçu bu obrazlardan icazəsiz istifadə etməklə müəlliflik hüquqlarını pozub.

Buna görə də şirkət məhkəmədən futbolçunun İnstagram və X (əvvəllər Twitter) sosial şəbəkələrindəki bütün paylaşımlarının ekspertizadan keçirilməsini tələb edib. Bu addım Aktürkoğlunun Harri Potter obrazlarını hansı məqsədlə və nə qədər müddətdə istifadə etdiyini müəyyənləşdirmək məqsədi daşıyır. Məsələ ilə bağlı məhkəmə prosesi davam edir.