Fərid Qayıbov ötən ay beynəlxalq yarışlarda yüksək nəticələr əldə etmiş idmançılarla görüşüb

Gənclər və idman naziri Fərid Qayıbov noyabrın 3-də beynəlxalq yarışlarda yüksək nailiyyətlər göstərmiş idmançılarla bir araya gəlib. Azərbaycan İdman Akademiyasında təşkil edilən görüş Dövlət Himninin səsləndirilməsi ilə başladı. Nazir idmançıların ötən ay ərzindəki fəaliyyətini yüksək qiymətləndirib.

Nazir Fərid Qayıbov çıxışı zamanı idmançıları və onların məşqçilərini təbrik etdi. O bildirdi ki, oktyabr ayı Azərbaycan idmanı üçün xüsusilə məhsuldar olub. Bu ayda Dövlət Himnimiz 17 ölkədə səsləndirildi.

Azərbaycan idmançıları bu dövr ərzində böyük uğurlara imza atıblar. Onlar ümumilikdə 70 qızıl, 102 gümüş və 157 bürünc olmaqla, cəmi 329 medal qazanıblar. Görüşdə idmançılarımızın beynəlxalq arenalarda qazandıqları nailiyyətləri əks etdirən qısa videoçarx da nümayiş olundu.

Daha sonra bir sıra idman növlərinin nümayəndələri çıxış etdilər. Onlar iştirak etdikləri yarışlar və əldə etdikləri yüksək nəticələr barədə məlumat verdilər. Sonda nazir Fərid Qayıbov idmançılara gələcək yarışlarda daha böyük uğurlar qazanmağı arzuladı.