FHN-in nümayəndə heyəti Çində səfərdə olub

Fövqəladə Hallar Nazirliyinin (FHN) nümayəndə heyəti Çin Xalq Respublikasında rəsmi səfərdə olub. Bu heyətə Nazirliyin Aviasiya dəstəsinin rəisi, general-mayor Əşrəf Qasımov rəhbərlik edirdi. Səfər çərçivəsində Azərbaycan nümayəndələri Çin Milli Aviasiya Texnologiyaları İdxalı və İxracı Korporasiyasının (CATIC) vitse-prezidenti Lyu Yi ilə görüşdü.

Görüş zamanı Azərbaycan və Çinin fövqəladə hallar sahəsindəki müvafiq qurumları arasında əməkdaşlıq əlaqələrinin əhəmiyyəti xüsusi qeyd edildi. Tərəflər fövqəladə halların nəticələrini aradan qaldırmaqda xüsusi rol oynayan aviasiya sahəsində ən son texnologiyaların tətbiqinin vacibliyini vurğuladılar. Həmçinin, qarşılıqlı maraq doğuran fərqli məsələlər ətrafında geniş fikir mübadiləsi aparıldı.

Səfər müddətində FHN nümayəndə heyəti, CATIC-in fəaliyyəti ilə yerində tanış oldu. Onlar Korporasiyanın iş prinsiplərini öyrəndilər və səfər çərçivəsində bir sıra əlavə görüşlər də keçirdilər.