FHN "Yanar dağ" qoruğunun yaxınlığında aşkarlanan metan qazı ilə bağlı məsələyə aydınlıq gətirib

Abşeron rayonu, Məmmədli qəsəbəsi ərazisində, "Yanar dağ" Dövlət Tarix-Mədəniyyət və Təbiət Qoruğu yaxınlığındakı fərdi yaşayış evlərinin həyətyanı sahələrində metan qazı (CH4) aşkar edilib. Qaz Həsənbəy Ağayev və Ziya Bünyadov küçələrində yerləşən evlərdə tapılıb. Bu barədə Fövqəladə Hallar Nazirliyi (FHN) rəsmi məlumat yayıb.

Vəziyyətin qiymətləndirilməsi üçün ilkin olaraq ərazidə müayinələr aparıldı. Bu müayinələrdə FHN, "Azəriqaz" İstehsalat Birliyi və Abşeron Rayon İcra Hakimiyyətinin mütəxəssisləri iştirak edib, daha sonra akt tərtib edilib. Müayinə zamanı ölçmə işləri yer səthində şulf üsulu ilə açılan dəliklərdə cihazlarla aparıldı. Nəticələr göstərdi ki, metan qazı fərdi evlərin bünövrəsinə yaxın hissələrdə, həyətyanı sahələrdə və yaşayış olmayan boş ərazilərdə mövcuddur. Aşkar edilən qazın potensial partlayış-yanğın təhlükəsi yaratdığını nəzərə alaraq, sakinlərin təhlükəsizliyini təmin etmək üçün təcili addımlar atıldı. "Azəriqaz" İstehsalat Birliyi tərəfindən əraziyə qazın nəqli müvəqqəti olaraq dayandırıldı.

Əhalinin və ərazilərin təhlükəsizliyini tam təmin etmək məqsədilə kompleks araşdırmanın aparılması zəruridir. Nazirlər Kabinetinin müvafiq tapşırığı əsasında çoxsaylı qurumlardan ibarət işçi qrup yaradılıb. Bu qrupa FHN, Ekologiya və Təbii Sərvətlər Nazirliyi, Elm və Təhsil Nazirliyi, SOCAR və Abşeron Rayon İcra Hakimiyyətinin nümayəndələri daxildir. Hazırda işçi qrupu aşkarlanan qazın mənbəyini və tərkibini dəqiq müəyyən etmək üçün ərazidə geniş işlər görür. Bu araşdırmanın nəticələri əsasında qısa müddətdə müvafiq qərar veriləcək.