"Fitch" SGC-nin 2029-cu ilədək qaz nəqlindən gözləndiyi gəlirləri açıqlayıb

“Fitch Ratings” beynəlxalq reytinq agentliyi “Cənub Qaz Dəhlizi” QSC-nin (SGC) maliyyə gözləntilərinə dair hesabat yayıb. Agentlik proqnozlaşdırır ki, SGC-nin qaz nəqlindən əldə etdiyi gəlir 2025-2028-ci illər ərzində sabit qalacaq və illik təxminən 1,5 milyard ABŞ dolları səviyyəsində olacaq. Bu sabit gəlir şirkətin maliyyə dayanıqlılığını təmin edən əsas amildir. Eyni zamanda, SGC-nin kapital xərcləri 2025-2028-ci illərdə orta hesabla ildə təxminən 0,2 milyard ABŞ dolları təşkil edəcək. Şirkət Avropanın qaz mənbələrini şaxələndirmək səyləri fonunda mühüm siyasi dəstək alır. Trans-Adriatik Qaz Boru Kəmərinə (TAP) Aİ Qaz Direktivinin bəzi müddəalarından azad olma statusu verilməsi SGC-nin bazar mövqeyini gücləndirir. Şirkət həmçinin Trans-Anadolu Təbii Qaz Kəmərinin (TANAP) və TAP-ın ötürücülük qabiliyyətinin artırılması hesabına genişlənməyi planlaşdırır.

Fitch SGC-nin borc öhdəliklərini mövcud vəsaitlər hesabına yerinə yetirməsini gözləyir. 2025-ci il avqustun 31-nə olan məlumata görə, SGC 2,3 milyard ABŞ dolları məbləğində pul vəsaitinə və depozitlərə malik idi. Bu vəsaitlərə əlavə olaraq, şirkətin "SOCAR Capital" ilə xəzinə sazişi çərçivəsində 1,5 milyard ABŞ dolları vəsaiti var. Şirkət 2026-cı ilin mart ayında ödənilməsi gözlənilən 2 milyard ABŞ dolları məbləğində avroistiqrazlar üzrə öhdəlik daşıyır. 2025-2028-ci illər dövründə borcun ödənilməsi, əsasən, bank kreditləri üzrə mülayim amortizasiya ödənişlərini nəzərdə tutur ki, bu da ildə təxminən 0,12 milyard ABŞ dollarıdır. SGC-nin ümumi borcu 2 milyard ABŞ dolları məbləğində avroistiqrazlar və 2032-2046-cı illərdə ödənilməli olan 1,5 milyard dollar məbləğində beynəlxalq inkişaf banklarının kreditlərindən ibarətdir.

Agentliyin qiymətləndirməsinə görə, şirkətin qaz nəqlindən əldə etdiyi EBITDA mütləq rəqəmlərlə sabit qalacaq, lakin onun ümumi EBITDA-dakı payı xeyli artacaq. Bu göstərici 2024-cü ildəki təxminən 60%-dən 2027-ci ilə qədər təxminən 80%-ə çatacaq. Digər tərəfdən, SGC-nin "upstream" (hasilat) seqmenti tədricən azalmaya məruz qalır. Bu, "Şahdəniz" yatağının təbii ehtiyatlarının tükənməsi ilə əlaqədardır. Hasilat seqmenti həmçinin qaz və neft qiymətlərindən asılıdır, çünki müqavilə həcmlərinin əhəmiyyətli hissəsi xammal qiymətlərinə bağlıdır. Fitch 2025-2028-ci illərdə hasilat seqmentində EBITDA-nın payının azalmasını proqnozlaşdırır. Bu azalma həm həcmlərin aşağı düşməsi, həm də xammal qiymətlərinin gözlənilən enişi ilə bağlıdır. Agentlik 2026-cı ildən başlayaraq SGC-nin illik vəsaitin böyük hissəsini Azərbaycan Dövlət Neft Şirkətinə (SOCAR) və dövlətə dividend şəklində yönləndirəcəyini gözləyir.