Gəncə Avropa çempionatına ev sahibliyi edir (FOTO)

Gəncə İdman Sarayı ilk dəfə olaraq 9 noyabr tarixində Aerobika gimnastikası üzrə Avropa çempionatına ev sahibliyi etdi. Bu, gənclər və 15 yaşadək idmançılar arasında təşkil edilən birinci Avropa çempionatıdır. Yarışda 20 fərqli ölkədən cəmi 380 gimnast iştirak edir. İdmançılar çempionluq uğrunda mübarizə apararaq fərdi, üçlük, qrup və aerodans proqramlarında çıxış edirlər. Gəncədə keçirilən bu beynəlxalq tədbir Azərbaycanın gimnastika idman növünə verdiyi yüksək önəmi göstərir.

Yarışın ilk günü gimnastlar təsnifat mərhələsində öz kompozisiyalarını tamaşaçılara göstərdilər. Musiqi ilə uyğunlaşdırılmış bu çıxışlar, rəngarəng şoular və xüsusi rəqs nömrələri arenadakı izləyicilərə həm əyləncəli, həm də ilhamverici anlar yaşatdı. Açılış mərasimində Gənclər və İdman Naziri, həmçinin Avropa Gimnastikasının Prezidenti Fərid Qayıbov çıxış etdi. O, əvvəlcə hər kəsi Zəfər Günü və Dövlət Bayrağı Günü münasibətilə təbrik etdi. Nazir şəhidlərin əziz xatirəsini ehtiramla yad edərək, qazilərə isə sağlam və xoşbəxt ömür arzuladı.

Nazir Fərid Qayıbov Azərbaycanın gimnastika sahəsində qazandığı uğurlardan danışaraq qeyd etdi ki, bu nailiyyətlər Prezident İlham Əliyevin və Azərbaycan Gimnastika Federasiyasının prezidenti, Birinci vitse-prezident Mehriban xanım Əliyevanın idmana göstərdiyi xüsusi diqqət və qayğının nəticəsidir. O, ölkəmizin belə nüfuzlu yarışlara ev sahibliyi etməsinin əhəmiyyətini vurğuladı və bütün idmançılara uğurlar arzuladı. Hazırda Gəncə İdman Sarayında Avstriya, Bolqarıstan, Çexiya, Rumıniya, Estoniya, Finlandiya, Fransa, Almaniya, Böyük Britaniya, Yunanıstan, Macarıstan, İtaliya, Litva, Portuqaliya, Moldova, Slovakiya, İspaniya, Türkiyə, Ukrayna və ev sahibi Azərbaycan gimnastları çempionluq uğrunda mübarizə aparırlar. Bu böyük idman hadisəsi 11 noyabr tarixində başa çatacaq.