Gənclər üçün media savadlılığı proqramlarının genişləndirilməsi vacibdir - Nigeriyalı nazir

Nigeriyanın İnformasiya və Milli Oriyentasiya naziri Məhəmməd İdris Malagi KİV sahəsində gəncləri əhatə edən savadlılıq proqramlarının təşkilini vacib addım adlandırıb.

Nazir bu bəyanatı “Dialoqun, əməkdaşlığın və regional həmrəyliyin təşviq edilməsi” mövzusunda keçirilən D-8 Media Forumuna ünvanladığı çıxışında edib. O, dayanıqlı həll yollarının mövcud yerli reallıqlardan irəli gəldiyini bildirib. Nazir vurğuladı ki, dezinformasiya ilə mübarizə aparmaqla yanaşı, KİV sahəsində gəncləri əhatə edən savadlılıq proqramlarının həyata keçirilməsi çox əhəmiyyətli məsələdir. Bu cür proqramlar təkcə fərdlərin inkişafına deyil, həm də regionda siyasi və sosial sabitliyin qorunmasına xidmət edir.

Məhəmməd İdris Malagi D-8 təşkilatının ölkələr arası əməkdaşlıqda oynadığı roldan danışdı. O qeyd etdi ki, D-8 üzv ölkələrinin ümumi Ümumi Daxili Məhsulu (ÜDM) 8 trilyon dollara bərabərdir. Nazir KİV sahəsində əməkdaşlığın və aparılan rəqəmsal islahatların bu ölkələrə böyük fayda verdiyini qeyd etdi. O bildirdi ki, D-8 daxilində belə bir ekosistemin yaradılması vacibdir. Nigeriya bu sahədəki təcrübəsini bölüşməyə hazırdır; ölkə artıq UNESCO-nun ikinci dərəcəli media savadlılığı institutunu yaradıb.

Nigeriya rəqəmsal platformalardan istifadə edən yüz milyondan çox əhaliyə malikdir. Nazir onu da əlavə etdi ki, gənc məzmun yaradıcıları artıq ölkənin ÜDM-inə ciddi töhfə verməkdədir. Məhəmməd İdris Malagi gənclər üçün təqaüd proqramlarının təşkili və xəbər redaksiyaları arasında əməkdaşlığın artırılmasına çağırış etdi. Nigeriya regionda stabilliyin qorunması və media sahəsində əməkdaşlığın gücləndirilməsi üçün dialoqlara hər zaman açıqdır. Əsas məqsəd ortaq fikirləri birləşdirərək müsbət dəyişikliklər yaratmaqdır.