Gürcüstan Hava Naviqasiya Xidməti: Türkiyə təyyarəsi həyəcan siqnalı vermədən radarlardan itib

Türkiyəyə məxsus "C-130" tipli hərbi təyyarə Gürcüstan ərazisindən keçdikdən bir neçə dəqiqə sonra radarlardan yoxa çıxıb. Təyyarə itməzdən əvvəl heç bir həyəcan siqnalı verməyib. Bu məlumatı Gürcüstan Hava Naviqasiya Xidməti (GASA) yayıb.

Qurumun açıqlamasına görə, təyyarə ilə əlaqə qəfil kəsilib. Hadisədən dərhal sonra müəyyən olunmuş protokollara əsasən axtarış-xilasetmə əməliyyatlarına başlanılıb. "Report"un Gürcüstan bürosunun xəbərinə görə, hadisə haqqında məlumat verən GASA, təyyarənin həqiqətən də həyəcan siqnalı olmadan onların nəzarət sistemindən yoxa çıxdığını təsdiqləyib.

Məlumatda qeyd olunur ki, Gürcüstan Hava Naviqasiya Xidməti təyyarə radarlardan itən andan etibarən müəyyən edilmiş bütün axtarış-xilasetmə tədbirlərini həyata keçirməyə başlayıb. Bu tədbirlər beynəlxalq protokollar çərçivəsində atılan ilkin addımlar olub.