Gürcüstanda ödəniş və hesab xidmətlərinin inkişafı ilə bağlı yeniliklər açıqlanıb

Gürcüstanda ödəniş və hesab xidmətlərinin inkişafı ilə bağlı ən son yeniliklər Bakıda keçirilən IX Beynəlxalq Bankçılıq Forumunda təqdim edilib. Bu barədə Gürcüstan Banklar Assosiasiyasının Açıq Bankçılıq layihəsinin CEO-su Mixeil Kapanadze məlumat verib.

O qeyd edib ki, ölkə artıq PSD2 "open banking" standartına uyğun ödəniş təşəbbüsü (PLT 2 tərzi) ilə işləyir. Bu sistemdə API-lər pulsuz təqdim olunur. Kapanadze aydınlaşdırıb ki, banklararası və beynəlxalq köçürmələr üçün müəyyən tariflər tətbiq olunsa da, API-nin özü üçün ödəniş tələb edilmir. Gələcəkdə bankların əlavə xərcləri qarşılamaq imkanını artırmaq məqsədilə ödənişli genişləndirilmiş API-lərin təqdimatı planlaşdırılır. Maliyyəçi əlavə edib ki, ödəniş hesabı məlumat xidməti hazırda pulsuz qalır, lakin kredit və depozit hesab məlumatlarının paylaşımı gələcəkdə ödənişli olacaq.

Kapanadze həmçinin Gürcüstan banklarında rəqəmsal qeydiyyat sisteminin (digital onboarding) böyük maraqla istifadə edildiyini vurğulayıb. Bu sistem biometrik yoxlama ilə selfi çəkərək "liveness check" prosedurundan keçməyə imkan verir. Bu sistem sayəsində bir bankın müştərisi olan şəxs, indi digər banklarda və ya qeyri-bank qurumlarında asanlıqla hesab aça bilir. Bu sadələşdirmə maliyyə xidmətlərinə çıxışı xeyli artırır. O bildirib ki, hazırda "push style" hesab məlumatı xidmətləri üzərində iş gedir. Bundan əlavə, yaxın gələcəkdə istifadəçilərə "request to pay" xidməti də təqdim ediləcək.

Ölkənin ödəniş sistemləri geniş əməliyyatları əhatə edir. Mixeil Kapanadze bildirib ki, mövcud sistemlər həm eyni bank daxilində, həm Gürcüstan daxilində, həm də xaricdəki köçürmələrə imkan yaradır. Hazırda ölkədə ani ödəniş sistemi ("instant ödəniş sistemi") mövcud deyil, amma bu istiqamətdə işlər gedir. O qeyd edib ki, Milli Bank ani ödəniş sisteminin tətbiqi üzərində çalışır. Sistem hazır olduqdan sonra Gürcüstan Banklar Assosiasiyası da onu əhatə edəcək və bu yeni maliyyə infrastrukturunun tətbiqinə dəstək verəcək.