Gürcüstanda Saakaşvili də daxil olmaqla 8 siyasətçiyə qarşı cinayət işi açılıb

Gürcüstan Prokurorluğu səkkiz müxalifyönümlü siyasətçi barəsində cinayət işi açıb. Bu şəxslər arasında keçmiş prezident Mixail Saakaşvili də yer alır. Müxalifət liderlərinə qarşı irəli sürülən ittihamlar olduqca ağırdır və bir neçə fərqli maddəni əhatə edir.

Prokurorluq tərəfindən irəli sürülən başlıca ittihamlar arasında “diversiya”, “hakimiyyətin devrilməsinə çağırış” və "düşmən dövlətin maraqlarına xidmət edən fəaliyyətə yardım" maddələri yer alır. Bu addım ölkədə siyasi gərginliyi xeyli artırıb.

Cinayət işi açılan şəxslərin hər birinə fərdi ittihamlar irəli sürülüb. Sabiq prezident Mixail Saakaşvili dövlət hakimiyyətinin devrilməsinə çağırışa görə ittiham olunur. Zura Caparidze və Georgi Vaşadze isə diversiya (318-ci maddə) və xarici dövlətə qarşı düşmənçilik fəaliyyətinə yardım etmə (319-cu maddə) maddələri üzrə məsuliyyətə cəlb ediliblər.

Siyahıdakı siyasətçilərdən Elena Xoştariyaya qarşı ən geniş ittiham spektrı irəli sürülüb. Ona diversiya (318-ci maddə), xarici dövlətə qarşı düşmənçilik fəaliyyətinə yardım və təhrik etmə (319-cu maddə), eləcə də konstitusiya quruluşuna qarşı yönəlmiş fəaliyyətin maliyyələşdirilməsi və ya dəstəklənməsi (321-ci maddə) ittihamları verilib. Digər dörd müxalif şəxs - Nika Gvaramiya, Nika Melia, Mamuka Xazaradze və Badri Caparidze isə diversiya (318-ci maddə) maddəsi ilə ittiham olunurlar. Bu şəxslər müxalifyönümlü fəaliyyətlərinə görə cəzalandırıla bilərlər.