Hərbi paradda sərgilənən texnikalar ordumuzun inkişafının sübutudur - MN zabiti

Müdafiə Nazirliyinin zabiti mayor Elşən Musayev Vətən Müharibəsində qələbənin 5-ci ildönümünə həsr olunmuş hərbi parad çərçivəsində fikirlərini bölüşüb. O, artıq 5-ci ildir ki, Zəfər Günü qeyd olunduğunu bildirib və özünün də İkinci Qarabağ müharibəsinin iştirakçısı olduğunu vurğulayıb. Bu münasibətlə, mayor Musayev başda Ali Baş Komandan olmaqla, bütün əsgər və zabitləri təbrik edib, onlara uzun ömür və can sağlığı arzulayıb.

Mayor Musayev şəhidlərə Allahdan rəhmət dilədiyini, qazilərə, şəhid ailələri və yaxınlarına səbr arzuladığını söyləyib. O, Allahın millətimizə və dövlətimizə bu cür zəfərləri daha çox yaşatmasını istəyib. MN zabiti 44 günlük müharibədə iştirakından danışarkən, müharibənin asan olmadığını və itkisiz keçmədiyini qeyd edib. Döyüşlərdə iştirak edən biri kimi o, çətinlikləri əvvəlcədən bildiklərini, lakin vətən torpaqlarının azad olunması üçün and içərək bu yola çıxdıqlarını bildirib. Mayor Musayev bu tapşırığı verən Prezidentə təşəkkür edib və tapşırığı ləyaqətlə yerinə yetirdiklərini, torpaqları azad etdiklərini söyləyib.

MN zabiti əlavə edib ki, 44 günlük müharibədə ordumuz üzərinə düşən bütün öhdəlikləri layiqincə yerinə yetirdi və ondan sonra da inkişaf davam etdi. Bu gün ordumuzda nümayiş etdirilən yeni hərbi texnikalar, silahlar və avadanlıqlar silahlı qüvvələrimizin gücünü və qüdrətini göstərir. Mayor Musayev hər bir ordu kimi bizim də öz strategiyamız və imkanlarımız olduğunu vurğulayıb. Onun sözlərinə görə, hərbi paradda sərgilənən hərbi texnikalar ordumuzun inkişafının və gücünün bir sübutudur. O, müharibədə şəxsən iştirak edən biri kimi hərbçilərin necə fədakarlıqla döyüşdüyünün şahidi olduğunu deyərək fikrini tamamlayıb.