Heydər Əliyev Fondu Lənkəran uşaq evini əsaslı yenidənqurmadan sonra istifadəyə verib

Lənkəran şəhərində yerləşən Osman Mirzəyev adına 5 saylı uşaq evi sosial xidmət müəssisəsinin binası Heydər Əliyev Fondu tərəfindən tam təmir olunaraq istifadəyə verilib. Noyabrın 21-də təmir işləri bitdikdən sonra uşaq evinin binasının açılış mərasimi baş tutdu. Tədbirdə Heydər Əliyev Fondunun vitse-prezidentləri Leyla Əliyeva və Alena Əliyeva iştirak ediblər.

Qeyd edək ki, Lənkəranda 1941-ci ildən fəaliyyət göstərən bu müəssisənin binası uzun illər ərzində köhnəlmişdi. Buna görə də bina artıq istifadəyə yararsız vəziyyətə düşmüşdü. Köhnəlmiş binanı yeniləmək məqsədilə Heydər Əliyev Fondu 2024-cü ildə uşaq evi sosial xidmət müəssisəsinin binasında əsaslı təmir işlərinə başladı. Tamamilə yenidən qurulan bina 1 və 2 mərtəbədən ibarət 5 korpusu əhatə edir. Bu sosial xidmət müəssisəsi kiçik və böyük yaş qrupları üzrə 120 uşağı yerləşdirmək gücündədir.

Uşaqların təhsili və bacarıqlarının inkişafı üçün binanın daxilində xüsusi otaqlar yaradılıb. Burada sinif, informatika otaqları ilə yanaşı, uşaqların peşəyə meyllərini dəstəkləyən tikiş və xalçaçılıq otaqları hazırlanıb. Həmçinin rəqs və musiqi otaqları, əlavə olaraq isə bir emalatxana da istifadəyə verilib. Müəssisə zəruri mebel və avadanlıqlarla təchiz edilib; fənn kabinetləri isə əyani vəsaitlərlə təmin olunub. Uşaqların gündəlik həyatı və sağlamlığı üçün istirahət və tibb otaqları, qarderob, kitabxana və oxu zalı mövcuddur.

Bundan əlavə, böyük yeməkxana, akt zalı və idman zalı da təmir edilib. Sosial xidmət müəssisəsinin həyətyanı ərazisində abadlıq və yaşıllaşdırma işləri aparılıb. Həyətdə açıq idman meydançası və oyun attraksionları ilə təmin olunan uşaq meydançası inşa edilib. Bu yenidənqurma işləri nəticəsində uşaqların təhlükəsiz və xoş vaxt keçirməsi üçün bütün lazımi şərait təmin olunub.