Heyvan bazarlarında fəaliyyətlər nə zaman bərpa olunacaq?

Azərbaycan Qida Təhlükəsizliyi Agentliyinin (AQTA) şöbə müdiri, Respublikanın baş dövlət baytarlıq müfəttişi Qalib Əbdüləliyev heyvan bazarlarının fəaliyyətinin məhdudlaşdırılması səbəblərini açıqlayıb. O bildirib ki, dünyada və regionda müşahidə olunan heyvan xəstəlikləri ilə bağlı mütəmadi qiymətləndirmələr aparılır. Bu qiymətləndirmələr Ümumdünya Heyvan Sağlamlığı Təşkilatının (ÜHST) müvafiq qərarlarına əsaslanır. Son dövrlərdə əldə edilən məlumatlar Cənubi Qafqaz regionuna daxil olan bir sıra ölkələrdə xüsusi təhlükəli heyvan xəstəliklərinin yayılma riski olduğunu göstərir. Qalib Əbdüləliyevin sözlərinə görə, ölkəmizdə də endemik xarakter daşıyan təhlükəli heyvan xəstəlikləri mövcuddur. Buna görə həm ölkəmizi xaricdən keçə biləcək xəstəliklərdən qorumaq, həm də ölkə daxilindəki mövcud xəstəliklərin yayılmasının qarşısını almaq məqsədilə müvafiq məhdudlaşdırıcı tədbirlərin həyata keçirilməsi zərurəti yaranmışdır.

Müfəttiş qeyd edib ki, xüsusi təhlükəli xəstəliklər adətən heyvanlar arasında bir heyvandan digərinə birbaşa təmas (kontakt) yolu ilə ötürülür. Bu baxımdan heyvan bazarları ən riskli yerlərdən biri hesab edilir. Bu səbəbdən qərar verildi ki, 25 oktyabr tarixindən etibarən respublika ərazisindəki bütün heyvan bazarlarının fəaliyyəti müvəqqəti olaraq dayandırılsın. Əbdüləliyev vurğulayıb ki, məhdudiyyət tədbirləri mərhələli şəkildə tətbiq olunur. Son bir həftə ərzində əhali arasında məlumatlandırma və maarifləndirmə işləri aparılmış, bazarlarda baytarlıq-sanitariya vəziyyəti qiymətləndirilmişdir. Bu addımın əsas məqsədi heyvanlar arasında təmasın qarşısını almaq və xəstəliklərin yayılma riskini minimuma endirməkdir.

Qalib Əbdüləliyev bildirib ki, heyvanların satışı birbaşa heyvandarlıq təsərrüfatlarında həyata keçiriləcək və buna hər hansı məhdudiyyət qoyulmur. Bazarların fəaliyyətinin bərpası isə yeni qaydalardan asılıdır. Eyni zamanda Azərbaycan Qida Təhlükəsizliyi Agentliyinin Kollegiyasının qərarı ilə "Heyvan bazarlarına dair baytarlıq-sanitariya norma və qaydaları" təsdiq edilib. Bu yeni sənədin tələblərinə uyğun olaraq bazarlarda yenidənqurma işləri aparıldıqdan və zəruri infrastruktur təmin edildikdən sonra onların fəaliyyəti bərpa olunacaq.