Hikmət Hacıyev: Qazax qardaşlarımız hörmət nümunəsi olaraq Müslüm Maqomayevin repertuarından mahnı ifa ediblər

Prezident İlham Əliyevin Qazaxıstana dövlət səfəri zamanı keçirilən rəsmi ziyafətdə Azərbaycan mədəniyyətinə xüsusi hörmət ifadə edən jest gerçəkləşib. Ziyafət proqramında əfsanəvi Müslüm Maqomayevin repertuarından məşhur "Синяя вечность" ("Mavi əbədiyyət") mahnısı səsləndirilib.

Bu mədəni tədbir barədə məlumatı Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev ictimailəşdirib. O, "X" sosial media hesabında etdiyi paylaşımda Qazaxıstan tərəfinin bu addımının iki ölkə arasındakı qardaşlıq münasibətlərini əks etdirdiyini vurğulayıb.

H. Hacıyev qeyd edib ki, Qazax qardaşlarımız Azərbaycan mədəniyyətinə hörmətin nümunəsi olaraq Maqomayevin repertuarından olan mahnını böyük sevgi və coşqu ilə ifa ediblər. Bu jest, dövlət səfəri çərçivəsində təşkil edilən rəsmi tədbirdə güclü mədəni əlaqələrin və mənəvi yaxınlığın ifadəsi olub. Mahnı məhz Prezident İlham Əliyevin şərəfinə verilən ziyafət zamanı səsləndirilib.