İdris İsayev: Məktəbəqədər təhsilə cəlbetmə hələ tam hədəfə çatmayıb

"Məktəbəqədər təhsilin əhatəlilik səviyyəsi tədricən artırılsa da, hədəf olaraq qoyulan səviyyəyə hələ tam nail olunmayıb".

Bunu Elm və Təhsil nazirinin müavini İdris İsayev “Azərbaycanın dayanıqlı inkişafı naminə təhsilə investisiya” mövzusunda keçirilən 7-ci Dayanıqlı İnkişaf Məqsədləri Dialoqunun açılış mərasimində dilə gətirib.

O bildirib ki, hazırda məktəbəqədər təhsilə cəlb edilən uşaqların ümumi səviyyəsi təqribən 10 faiz civarındadır: "Bu göstəricinin artırılması üçün qarşıda xeyli işlər dayanır. Məqsədimiz 2026-cı ilin sonuna qədər bu rəqəmi 15 faizə qədər yüksəltməkdir. Bu istiqamətdə strateji planımız artıq yenilənib".

Müavin qeyd edib ki, məktəbəqədər təhsilə cəlb olunan uşaqların böyük əksəriyyəti 5 yaş qrupuna aiddir: “1-6 yaşlı uşaqlara yönəlmiş proqramlar mövcuddur, lakin məhz 5 yaş qrupunda iştirak səviyyəsi daha yüksəkdir – 83-84 faiz ətrafında dəyişir. 1-5 yaşlı uşaqların cəlbedilməsi üçün isə müxtəlif tədbirlər həyata keçirilir və bu proses mərhələli şəkildə genişləndirilməkdədir”.