İlk 9 ayda neçə nəfərə proaktiv qaydada pensiya təyinatı aparılıb?

Dövlət Sosial Müdafiə Fondu (DSMF) 2025-ci ilin yanvar-sentyabr aylarına aid proaktiv pensiya təyinatı statistikasını açıqlayıb. Bu müddət ərzində 32,7 min nəfərdən çox şəxsə yaşa, əlilliyə və ailə başçısını itirməyə görə pensiya təyin edilib.

Bu göstərici Dövlət Sosial Müdafiə Fondunun tətbiq etdiyi avtomatlaşdırılmış sistemin genişlənməsini əks etdirir. Bildirilib ki, 2025-ci ildə pensiya təyinatı alanların 64,96%-i kişilər, 35,04%-i isə qadınlar olub.

Qeyd edilməlidir ki, 2024-cü ilin eyni dövrü ilə müqayisədə proaktiv təyinat alanların sayında nəzərəçarpacaq artım var. Keçən ilin yanvar-sentyabr aylarında 28 min nəfərdən çox şəxsə proaktiv qaydada pensiya təyin edilmişdi. 2024-cü ildə bu şəxslərin 66,41%-i kişilər, 33,59%-i isə qadınlar idi. Beləliklə, 2025-ci ildə proaktiv təyinat alanlar arasında qadınların payı cüzi yüksəlib.