İqtisadiyyat naziri: "Son 6 ildə qeyri-neft-qaz özəl sektorunda gündəlik 200 yeni iş yeri yaradılıb"

İqtisadiyyat naziri Mikayıl Cabbarov Milli Məclisin plenar iclasında "2026-cı il dövlət büdcəsi haqqında" qanun layihəsinin I oxunuşunun müzakirəsi zamanı ölkə iqtisadiyyatının son illərdə əldə etdiyi mühüm nailiyyətləri açıqlayıb. Nazir bildirib ki, 1 yanvar 2019-cu ildən 1 noyabr 2025-ci ilədək olan dövrdə qeyri-neft-qaz özəl sektorunda orta hesabla hər günə 200-ə yaxın yeni iş yerinin yaradılması qeydə alınıb. O, hər təqvim günü 200 iş yerinin yaranmasını ölkə üçün çox böyük iqtisadi nəticə adlandırıb.

Cabbarov qeyd edib ki, əmək haqqı islahatı əmək bazarında böyük şəffaflaşma effekti yaradıb. Bu islahat çərçivəsində, qeyri-neft-qaz özəl sektorda 8 000 manata qədər əmək haqlarından gəlir vergisindən azad olunması təmin edilib. Bunun nəticəsində, 1 yanvar 2019-cu ildən 1 noyabr 2025-ci ilədək olan müddətdə qeyri-neft-qaz özəl sektorda əmək müqavilələrinin sayı 481 min artaraq 1 milyonu ötüb. Sektorun cəmi əmək müqavilələrindəki payı isə 38%-dən 54%-ə yüksəlib. Bundan başqa, aktiv vergi ödəyicilərinin sayı da xeyli çoxalıb; 1 yanvar 2019-cu illə müqayisədə 1 noyabr 2025-ci il tarixinə bu say iki dəfə artaraq 845 mini ötüb.

Nazir ölkənin maliyyə dayanıqlığı ilə bağlı da vacib göstəriciləri qeyd edib. Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun gəlirlərində büdcədən ayırmaların payı azalaraq 2018-ci ildəki 35,6%-dən 2024-cü ildə 17,5%-ə düşüb. Strateji valyuta ehtiyatları da əhəmiyyətli dərəcədə artıb. 1 yanvar 2019-cu ildə 44,7 milyard ABŞ dolları olan ehtiyatlar, 1 noyabr 2025-ci il tarixinə 1,8 dəfə çoxalıb və 82,5 milyard ABŞ dolları təşkil edib. Bu məbləğ 2025-ci ilə gözlənilən ümumdaxili məhsulun həcmini üstələyir. Qeyri-neft-qaz sənaye istehsalı 2019-2024-cü illərdə 1,9 dəfə böyüyüb.

İqtisadiyyat naziri bildirib ki, iri dövlət şirkətlərinin idarə edilməsində səmərəliliyin artırılması və korporativ idarəetmə prinsiplərinin tətbiqi təmin edilib. Bu məqsədlə Azərbaycan İnvestisiya Holdinqi, eləcə də Azərbaycan Nəqliyyat və Kommunikasiya Holdinqi kimi yeni strukturlar yaradılıb. Bu strukturlara daxil olan dövlət şirkətlərinin əksəriyyətinin gəlirliliyi və iqtisadi göstəriciləri xeyli yaxşılaşıb. Nəticədə, bu şirkətlərin dövlət büdcəsindən asılılığı azalıb. Cabbarovun sözlərinə görə, bu statistika son illərdə həyata keçirilən iqtisadi siyasətin uğurunu təsdiqləyir.