İranın müxtəlif bölgələrində AES-lər inşa olunacaq – Vitse-prezident

İran yaxın gələcəkdə ölkənin cənubunda və şimalında 8 yeni Atom Elektrik Stansiyası (AES) inşa etməyi planlaşdırır. Bu layihə barədə İranın vitse-prezidenti və Atom Enerjisi Təşkilatının sədri Məhəmməd Eslami prezident Məsud Pezeşkianın nüvə sənayesi müdirləri ilə görüşündə danışıb. Eslami qeyd edib ki, ölkənin fərqli yerlərində AES-lərin tikintisi ilə nüvə sahəsində elektrik istehsalını 20 min meqavata qədər qaldırmaq üçün işlər görülür. Bu stansiyalar tənzimlənən proqrama əsasən ölkənin elektrik ehtiyaclarını qarşılamağa kömək edəcək. Yeni AES-lərin tikintisi üzrə müqavilə Rusiya ilə əməkdaşlıq çərçivəsində imzalanıb.

Planlara görə, yeni tikiləcək stansiyalardan 4-ü İranın cənubunda, Buşehr vilayətində yerləşəcək. Digər 4 stansiya isə ölkənin şimal hissəsində inşa olunacaq. Hazırda İranda hələlik yeganə işləyən stansiya 2003-cü ildə istifadəyə verilmiş Buşehr AES-dir. Buşehr AES-nin 1-ci bloku 2011-ci ildə fəaliyyətə başlayıb. 2013-cü ildən bu blok maksimum gücü, yəni 1000 meqavat saat elektrik istehsal edir. On il ərzində Buşehr stansiyası 65 milyard kilovat saatdan çox elektrik enerjisi hasil edib. Bundan əlavə, Xuzistan vilayətində, 1979-cu il İslam İnqilabından əvvəl başlanmış Darxovin Atom Elektrik Stansiyasının tikintisi yerli mütəxəssislər tərəfindən bərpa edilib. Vitse-prezident Eslami həmçinin İranın şimalında, Xəzər dənizi sahillərində yerləşən Gülüstan vilayətində də yeni AES üçün məkanın müəyyənləşdiyini bildirib.

Mövcud Buşehr stansiyasının 2 və 3-cü bloklarının tikintisi də sürətlə davam edir. Bu layihəyə 2017-ci ildə 50 hektar ərazidə başlanıb. Təşkilat sədri qeyd edib ki, hətta İrana qarşı 12 günlük hərbi hava hücumları zamanı belə, bu blokların tikintisi dayandırılmayıb. Bu iki yeni blok istifadəyə verildikdə, hər biri 1057 meqavat elektrik enerjisi istehsal etmək gücünə malik olacaq. Bu genişlənmə layihəsi böyük iqtisadi və ekoloji faydalar vəd edir. Onların işə düşməsi ildə 10 milyon barel xam neftə və ya 1,6 milyard kubmetr qaza qənaət etməyə imkan yaradacaq. Eyni zamanda, bu, 7 milyon ton çirkləndirici qazın ətraf mühitə yayılmasının qarşısını alacaq.