İRİA yeni vençur maliyyələşmə mexanizminə 1 milyon dollar vəsait qoyacaq

Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyi (İRİA) vençur investisiyalarının aktiv inkişafı istiqamətində mühüm addımlar atır. Ölkədə vençur investisiya fondlarının yaradılması məsələsi beynəlxalq meyillər və ekosistemin tələbləri nəzərə alınmaqla araşdırılır. Agentlikdən verilən məlumata görə, yaxın dövrdə beynəlxalq əməkdaşlığın və yeni investisiya fondlarının fəal genişlənməsi gözlənilir. Startaplar üçün infrastrukturun, maliyyələşmə yollarının və bazara çıxış imkanlarının artırılması ən vacib hədəflərdir.

Bu ilin sentyabrında keçirilən “INMerge” İnnovasiya Sammitində "White Hill Capital" fondu ilə birgə "Tumar Ventures" adlı yeni vençur maliyyələşmə mexanizminin qurulduğu elan edildi. Təsis sazişi də bu sammitdə imzalandı. "Tumar Ventures"un nizamnamə kapitalı 1 milyon ABŞ dollarıdır və ilkin mərhələdə İRİA tərəfindən maliyyələşdiriləcək. İlkin olaraq 1 milyon ABŞ dolları həcmində vəsait qoyuluşu nəzərdə tutulur, bu istiqamətdə müvafiq danışıqlar aparılır.

İRİA fəaliyyətini qabaqcıl dünya təcrübəsini və Azərbaycan ekosisteminin ehtiyaclarını təhlil edərək beş əsas sütun üzərində qurub. Bu sütunlara startaplar üçün infrastruktur, maliyyələşmə, bazar əlçatanlığına dəstək daxildir. Həmçinin, ekosistem daxilində insan kapitalının və innovasiya mədəniyyətinin inkişaf etdirilməsi də əsas fəaliyyət sahələrindəndir. Startapların maliyyə resurslarına çıxışını dəstəkləmək məqsədilə 2022-ci ildə Agentliyin dəstəyi ilə yaradılan “Caucasus Ventures” fondu indiyədək 30-a yaxın startapa dəstək göstərib.

Xarici vençur kapital fondlarının Azərbaycana marağını artırmaq üçün iki əsas istiqamətdə iş aparılır. Birinci istiqamət qanunvericiliyin təkmilləşdirilməsi və vençur maliyyələşməsi üçün lazımi hüquqi bazanın yaradılmasıdır. Agentlik bu sahədə son üç ildə işləyərək, müvafiq qanunvericilik aktlarının yenilənməsinə, investorlar üçün şəffaf və əlverişli mühitin qurulmasına diqqət yetirir. İkinci istiqamət beynəlxalq konfranslar və tədbirlər təşkil etməklə qlobal əlaqələrin qurulmasıdır. Azərbaycanda təşkil olunan “INMerge Innovation Summit” kimi tədbirlər uğurlu nümunələrdir.

Qarşılıqlı investisiya təşviqi modelinə əsaslanan kapital yerləşdirmə mexanizmi də işlədilir. Buna nümunə olaraq Qazaxıstan əsaslı “WhiteHill Capital” vençur fondu ilə Azərbaycanda fəaliyyət göstərən “Tumar Ventures” MMC-nin əməkdaşlığını göstərmək olar. Bu modelə görə, "Tumar Ventures"un Azərbaycan mənşəli innovativ layihələrə investisiya etdiyi hər 1 dollara qarşılığında Qazaxıstan fondu 2 dollar investisiya edir. Agentlik gələcək illərdə də fəaliyyətlərini davam etdirəcək və xarici investorlar üçün daha açıq və səmərəli mexanizmlər üzərində işləyir.