İsrail Livanla sərhəddə 5 gün hərbi təlimlər keçirəcək

İsrail Müdafiə Qüvvələri (IDF) Livanla sərhəddə beş gün davam edəcək genişmiqyaslı hərbi təlimlərə başlayır.

Bu təlimlər Livanla sərhəd bölgəsinə yaxın ərazilərdə, eləcə də İsrailin bu regiondakı şəhərlərində keçiriləcək. Təlimlərin bazar günü axşam başlaması və cümə axşamı yekunlaşması planlaşdırılır. İsrail ordusu təlimlər çərçivəsində müxtəlif ssenarilər üzərində işləyəcək. Bu ssenarilərə ərazinin müdafiəsi və təcili təhdidlərə cavab vermək kimi fəaliyyətlər daxildir.

Hərbi rəsmilər xəbərdarlıq ediblər ki, bu müddət ərzində Livana bitişik ərazilərdə, xüsusən də Qaliley bölgəsində partlayış səsləri eşidilə bilər. Təlimlərlə əlaqədar pilotsuz uçuş aparatlarının, həmçinin hava və dəniz qüvvələrinin fəaliyyəti artacaq. Bu böyük təlimlər regional müdafiə hazırlığını yoxlamağı hədəfləyir.