İsrailin “Eurovision” mahnı müsabiqəsindəki aqibəti müzakirəyə çıxarılacaq

İsrailin "Eurovision" Mahnı Müsabiqəsindəki aqibəti Cenevrədə təşkil edilən və iki gün davam edəcək iclasda (dekabrın 4-5-də) müzakirəyə çıxarılacaq. Bu görüşün əsas səbəbi İsrailin Qəzzada keçirdiyi hərbi əməliyyatlardır. Bir sıra ölkələr bu əməliyyatlara görə İsrailin müsabiqədən kənarlaşdırılmasını tələb edir.

Beynəlxalq təzyiq getdikcə artır. Son aylarda İslandiya, İrlandiya, İspaniya, və Niderland kimi ölkələr rəsmi xəbərdarlıq ediblər. Onlar bəyan edirlər ki, əgər İsrail 2026-cı il müsabiqəsində iştirak edərsə, onlar yarışdan çıxacaqlar. Digər Avropa ölkələri də Qəzzadakı vəziyyətlə əlaqədar boykot variantını düşünürlər. Bu ölkələrə Belçika, Finlandiya, və İsveç daxildir. Bu vəziyyət yarışmanın təşkilatçısı olan Avropa Yayım İttifaqı (EBU) üzərində böyük qərar vermə yükü yaradır.

Bununla belə, bütün ölkələr İsrailin müsabiqədən kənarlaşdırılması tələbini dəstəkləmir. Mahnı müsabiqəsinə ev sahibliyi edən Avstriya əksinə, İsrailə güclü dəstək göstərib və onun "Eurovision"da qalmasını istədiyini ifadə edib. EBU bu məsələni üzvlərinin səsverməsinə hələ noyabr ayında çıxarmağı planlaşdırırdı. Lakin İsrail və HƏMAS arasında oktyabrın 10-da Qəzzada elan edilmiş atəşkəs razılaşmasından bir neçə gün sonra təşkilat müzakirələri dekabrın 4-5-ə qədər təxirə salmağa qərar verdi. İndi Avropa Yayım İttifaqının (EBU) bu həssas siyasi və mədəni qarşıdurmada necə bir qərar verəcəyi gözlənilir.