İstanbulda 70 kq qızılla saxlanılan hərbi attaşenin sabiq baş köməkçisinin məhkəməsi başlayıb

Azərbaycan Silahlı Qüvvələrinin ABŞ-dakı hərbi attaşesinin sabiq baş köməkçisi Qəhraman Məmmədovun barəsində Dövlət Təhlükəsizliyi Xidmətində (DTX) başlanmış cinayət işi üzrə məhkəmənin hazırlıq iclası keçirilib. Qeyd edək ki, Məmmədov İstanbulda 70 kiloqram qızıl külçələri ilə saxlanılmışdı.

Bu gün Bakı Hərbi Məhkəməsində hakim Fikrət Əliyevin sədrliyi ilə proses başladı. Məhkəmə təqsirləndirilən şəxsin anket məlumatlarını dəqiqləşdirdi. Məmmədova eyni zamanda hüquq və vəzifələri haqqında məlumat verildi. Məhkəmə cinayət işinin baxış mərhələsinə verilməsi haqqında qərar qəbul etdi. İş üzrə baxış iclası 28 noyabr tarixinə təyin olunub. Polkovnik-leytenant rütbəsində xidmət etmiş Qəhraman Məmmədovun digər ölkə vətəndaşları ilə əlbir olaraq xarici dövlətlər arasında külli miqdarda qaçaqmalçılıq cinayətlərinin törədilməsində iştirak etməsinə dair əsaslı şübhələr müəyyən edilib.

DTX-nin yaydığı məlumata görə, Məmmədov əvvəlcədən razılaşmış bir qrup şəxslə BƏƏ-dən Türkiyəyə daşınan külli miqdarda qızıl külçələrini qaçaqmalçılıq yolu ilə gömrük sərhədindən keçirməkdə iştirak edib. Diplomatik statusa malik olan Qəhraman Məmmədov 22 noyabr 2024-cü ildə ABŞ-dan Türkiyəyə gəlmişdi. Həmin gün o, İstanbul Beynəlxalq Hava Limanında gömrük nəzarətindən kənarda saxlanılan bir çantanı götürdü. Çantanın içərisində xüsusilə külli miqdarda qızıl külçələri var idi. O, diplomatik heyət üzvləri üçün nəzərdə tutulan imtiyazlardan və diplomatik pasportdan istifadə edərək, vəzifə səlahiyyətlərini qəsdən qulluq mənafeyinin əksinə yönəltməklə qızılları bəyan etmədən gömrük sərhədindən keçirdi. Bu hadisədə diplomatik immunitetdən sui-istifadə cəhdi diqqət çəkir.

Qəhraman Məmmədov qızıl külçələrini əlbir olduğu şəxsə təhvil vermək məqsədilə taksi ilə İstanbulda yerləşən hotellərdən birinə doğru gedərkən Türkiyə hüquq-mühafizə orqanları tərəfindən saxlanılıb. Onun çantasında axtarış zamanı 70 kiloqram çəkidə qızıl külçələr aşkar edildi. Həmin qızılların ümumi dəyəri 10.391.970,08 manat olub. Araşdırmalar nəticəsində hava limanındakı saxlanc yerində gömrükdən keçməmiş daha 14 kiloqram qızıl külçəsinin olduğu əlavə bir çanta da tapılıb. Qəhraman Məmmədov DTX-də davam edən cinayət işi üzrə AR Cinayət Məcəlləsinin qaçaqmalçılıqla bağlı maddələri, həmçinin vəzifə səlahiyyətlərindən sui-istifadə maddəsi ilə cinayət məsuliyyətinə cəlb edilib. Bakı Hərbi Məhkəməsi onun barəsində həbs qətimkan tədbiri seçmişdi.