İsveç Rusiyadakı hədəflərə çata bilən qanadlı raketlər əldə etmək niyyətindədir

İsveç Silahlı Qüvvələri 2000 kilometr mənzilli qanadlı raketlər əldə etməyi planlaşdırır. Bu raketlər Rusiyanın dərinliklərindəki hədəflərə çata bilir. Bu hərbi addım İsveçin müdafiə imkanlarını əhəmiyyətli dərəcədə genişləndirmək niyyətini göstərir.

Məlumat İsveç Silahlı Qüvvələrinin rəhbərliyinin hazırladığı hesabatına istinad edən SVT telekanalı tərəfindən yayılıb. İsveç ordusunun Baş Qərargah rəisi Karl-Yohan Edström bu raketlərin potensial istifadə məqsədlərini izah edib. O bildirib ki, belə silahlar Rusiyanın NATO-ya mümkün hücumu zamanı tətbiq edilə bilər. Edströmün sözlərinə görə, bu, idarəetmə sistemləri və sensorlardan tutmuş kritik infrastruktura qədər hər şeyi əhatə edən hədəfləri vurmaq gücündədir.

Hərbi hesabat yalnız raket planlarına deyil, həm də digər müdafiə ehtiyaclarına diqqət çəkib. Sənəd minaaxtaran gəmilərin təcili dəyişdirilməsinin zəruriliyini qeyd edir. Bunun səbəbi isə gəmilərin bir tərəfdən köhnəlməsi, digər tərəfdən isə ticarət donanmasının qorunması ehtiyacının artmasıdır.