İtkin düşən hərbçi Teymur Allahverdiyevin nəşinin qalıqları Neftçalada dəfn olunub - FOTO

Birinci Qarabağ müharibəsində itkin düşmüş hesab edilən şəhid Allahverdiyev Teymur Qüdrət oğlunun nəşinin qalıqları tapıldıqdan sonra vida mərasimi keçirilib. O, 33 il ərzində itkinlər siyahısında idi. Qalıqların tapılması ilə ailəsi və ictimaiyyət üçün bu uzun gözlənti sona çatdı. Şəhidin nəşinin qalıqları ailəsinə təhvil verilib, daha sonra onun yaşadığı evdə vida mərasimi təşkil edilib. Bu gün Teymur Allahverdiyev doğma Neftçala rayonunun Qaçaqkənd kəndi qəbristanlığında torpağa tapşırıldı.

Dəfn mərasimi yüksək iştirakla keçdi. Mərhumun yaxınları və doğmaları ilə yanaşı, mərasimdə rayon ictimaiyyəti, yerli dövlət qurumlarının nümayəndələri və hərbi qulluqçular iştirak etdi. Vətən uğrunda döyüşlərdə iştirak edən şəhidin xatirəsi böyük ehtiramla yad edildi. Onun nəşinin qalıqlarının 33 ildən sonra tapılaraq ailəsinə təqdim edilməsi uzun illər davam edən həsrətə son qoydu.

Teymur Allahverdiyev haqqında verilən məlumatlara görə, o, 1967-ci ildə məhz Neftçala rayonunun Qaçaqkənd kəndində anadan olmuşdu. O, Birinci Qarabağ müharibəsi döyüşlərində fəal iştirak edib. Şəhid hərbçi 8 may 1992-ci ildə Şuşa şəhərində gedən ağır döyüşlər zamanı itkin düşmüş hesab edilmişdi. Nəhayət, illər sonra tapılan qalıqların dəfn edilməsi ilə Teymur Allahverdiyevin ruhu doğma torpağında əbədi istirahətə qovuşdu.