Keçən ay zəhərlənmədən ölənlərin sayı açıqlandı

Kliniki Tibbi Mərkəzin (KTM) Toksikologiya şöbəsi 2025-ci ilin oktyabr ayı ərzində zəhərlənmə diaqnozu ilə hospitalizasiya edilən şəxslərin statistikasını açıqlayıb. Ümumilikdə 98 nəfər müxtəlif mənşəli zəhərlənmə səbəbi ilə müalicəyə cəlb edilib.

KTM-in mətbuat katibi Ruzbeh Məmmədin verdiyi məlumata görə, vaxtında aparılan tibbi tədbirlər sayəsində 94 pasiyentin vəziyyəti stabilləşdirilib. Onlar qənaətbəxş durumda ambulator müalicə üçün evə buraxılıblar. Lakin bütün intensiv müalicə səylərinə baxmayaraq, təəssüf ki, 4 nəfərin (3 kişi və 1 qadın) həyatını xilas etmək mümkün olmayıb. Kliniki Tibbi Mərkəz həkimləri həmin şəxslərə ixtisaslaşmış toksikoloji və reanimasion yardım, eləcə də intensiv terapiya və detoksikasiya tədbirləri tətbiq ediblər.

Hospitalizasiya olunan 98 nəfər zəhərlənmə halının səbəbləri fərqli olub. Pasiyentlərin ən böyük hissəsi dərman preparatlarından (44 nəfər) və sirkə turşusundan (30 nəfər) zəhərlənmişdi. Bundan başqa, 5 nəfər spirtli içkilərdən, 5 nəfər ilan sancmasından, 5 nəfər anafilaktik şokdan, 3 nəfər allergik reaksiyalardan, 3 nəfər isə dəm qazından zəhərlənmə səbəbi ilə müalicə alıb. Qalan iki nəfər yandırıcı məhlullardan, bir nəfər isə fosfor üzvi birləşmələrindən zəhərlənmişdi.

Təəssüflə xilas edilə bilməyən 4 nəfərin ölüm hallarının əsas səbəbləri açıqlanıb. Ölüm halları ağır dərəcəli anafilaktik şok, sirkə turşusu ilə zəhərlənmə, həmçinin dərman preparatlarının yüksək dozada qəbulu nəticəsində yaranmış toksik vəziyyət olub. Bu rəqəmlər göstərir ki, xüsusilə dərman və turşu zəhərlənmələri ciddi nəticələrə gətirib çıxarır.