Kəmaləddin Heydərov Gürcüstan daxili işlər naziri ilə telefon danışığı aparıb

Türkiyə Hərbi Hava Qüvvələrinə məxsus hərbi yük təyyarəsinin Gürcüstan ərazisində qəzaya uğraması ilə əlaqədar Azərbaycanla Gürcüstan arasında təcili telefon danışığı baş tutub. Azərbaycan Respublikasının fövqəladə hallar naziri, general-polkovnik Kəmaləddin Heydərov Gürcüstan daxili işlər naziri Gela Geladze ilə vəziyyəti müzakirə edib. Söhbət zamanı baş vermiş faciə ilə bağlı hazırkı vəziyyət əsas müzakirə mövzusu olub.

Nazir Heydərov Azərbaycanın faciənin nəticələrinin aradan qaldırılması üçün dərhal yardım etməyə hazır olduğunu bildirib. O, Prezident İlham Əliyevin tapşırığına əsasən, Azərbaycan FHN-in qüvvələrinin axtarış-xilasetmə əməliyyatına dərhal qoşulmağa və müvafiq dəstək tədbirləri görməyə tam hazır olduğunu çatdırıb. Azərbaycan Fövqəladə Hallar Nazirliyinin qüvvələri hər an köməyə getmək üçün sərhəddə hazır vəziyyətdədir.

Gürcüstan daxili işlər naziri Gela Geladze bu qardaşlıq dəstəyinə görə təşəkkürünü bildirib. O qeyd edib ki, əməliyyatlara əlavə xilasetmə qüvvələrinin cəlb edilməsinə ehtiyac yaranarsa, sərhəddə gözləyən Azərbaycan FHN-in xilasetmə qüvvələrinin cəlb edilməsi üçün müraciət olunacaq. Məlumatlar göstərir ki, iki qurum arasında təmaslar və vəziyyətlə bağlı məlumat mübadiləsi davam edir.