Kənd Təsərrüfatı Nazirliyindən dabaq xəstəliyi ilə bağlı AÇIQLAMA

Kənd Təsərrüfatı Nazirliyi (KTN) heyvandarlıqda yayılan dabaq xəstəliyi ilə bağlı mühüm məlumatlar açıqlayıb. Nazirliyin Heyvandarlığın təşkili və monitorinqi şöbəsinin müdiri Bayandur Rzayev qeyd edir ki, bu xəstəliyə yoluxan heyvanlarda ölüm faizi çox aşağıdır. Əgər heyvanın temperaturu yüksək deyilsə, ölüm faizi maksimum halda 0,1-0,2%-ə bərabər olur. Temperaturu yüksək olmayan heyvanlarda ölüm halı demək olar ki, baş vermir.

Qurum rəsmisi fermerləri diqqətli olmağa çağırır. Heyvanda halsızlıq və iştahsızlıq müşahidə olunduqda dərhal dabaq xəstəliyindən şübhələnmək lazımdır. Belə halları görən fermerlər dərhal sahə üzrə baytar həkiminə, yaxud rayon baytarlıq idarəsinə müraciət etməlidirlər. Hazırda Kənd Təsərrüfatı Nazirliyi tərəfindən ölkə ərazisində dabaq xəstəliyinə qarşı peyvəndləmə işləri aparılır. Bununla yanaşı, xəstəliyin bir ərazidən digərinə keçməsinin qarşısını almaq üçün profilaktik kimyəvi dezinfeksiya və heyvan bazarlarında mexaniki təmizləmə işləri həyata keçirilir.

Bununla belə, Bayandur Rzayev bəzi fermerlərin peyvəndləmə prosesinə inamsız yanaşdığını və müəyyən bəhanələr gətirdiyini vurğulayıb. O, fermerlərə müraciət edərək peyvəndləmə prosesindən qaçmamağı tövsiyə edir. Rzayev bildirir ki, peyvəndləmə dövlətin qayğısının bir nümunəsidir və hər bir vətəndaş bu imkandan yararlanmalıdır. Peyvəndləmə heyvanların sağlamlığını qorumaqda vacib bir addımdır.